TURA: Garo Hills-ni a·kawe jolrango, Below Poverty Line (BPL) nokdangrangba nangana bate bijolini kajinarangko nangtokengani a·sel neng·nikanirangko chagrongna nangtokenga ine Tura-ni MDC aro BJP-ni state vice president Bernard N Marak parakataha.
“Ma·mong sorkarini Saubhagya scheme, jekon an·ching BPL line ine ma·sitoka, ian songadam nokadamrango kangal cholgri ong·gipa nokdangrangna bijoliko on·na ra·gatgipa scheme-sa ong·achim indiba ia scheme-ni bijoliko on·anio songni manderangna nangana bate bijoli bill-rangko sokatengani a·sel songni manderang neng·nikanirangko chagrongna nangtokenga,” ine Marak parakataha.
Bijoli bill-rangko nangana bate sokatenganiara kangal cholgrirangoniko tangka dabie ra·a gita ong·enga ineba ua matnangataha.
“Songni manderangna u·iatchenggija smart metre-rangkoba chate on·enga. Bang·bata smart metre-rangan name kam ka·giparang ong·ja aro bijolini kajinarangko nangana bate sokatrongenga. Songni manderang, iani bidingo badi ka·engoba maming dakchakanirangko man·jaengani a·sel, ia kajinarangko gamna nangaon ga·aktokenga,” ine Marak parakataha.
“Meghalaya a·doko Tribal-rangde kajinarangko gamna nangani ong·jachim indiba manderangoniko bijoli, mobile aro uandakgipa cholrangko on·anichi kajinarangko ra·skaenga. Kangal cholgrirangna bijoliko sale on·na gita ma·mong sorkari, tangka paisarangko chamatahachim indiba ia kangal cholgrirangko dingtang dingtang department-rang sinjetna jotton ka·skaenga. Kangal cholgrirangoniko bijolini kajinarangko bate ra·aniara Tribal-rangoniko ra·seke ra·ani gitan ong·enga,” ine Tura-ni MDC parakataha.
Marak-ni parakatani gitade, badiaba songrangode mitam nokdangrang bijoliko man·tokjaengoba bijolini bill-rangkode man·sotokengani a·sel kajinarangko gamna nangaon ga·akenga.
“Mitam songrango, mitam nokdangrang bijoli connection grian bijoli bill-rangde sokskaenga. Mitam songrangode jagimikrang bijoli dongjagenchimoba bijolini bill-rang apsan ong·en sokaienga. Mitam segri me·chikrang, japrakon gong 3,500-oni gong 5000-mang ong·pile bijolini bill-rangko man·enga ine angna badi ka·aha. Uni gimin kangal cholgrirangoniko iandake a·dok sorkari, kajinarangko bate ra·anichi ra·seke ra·na nangja,” ine Marak parakataha.
