TURA: West Garo Hills a·jani Selsella C&RD Block ning·o, Agriculture Inspector ong·e kamko ka·enggipa mande saksa, PM-KISAN-ni ning·o game ge·e cha·giparangoniko verification-na tangka paisarangko gile ra·a ine badi ka·doangani ja·man, ia official-ni kosako am·sandianirangko dakon, ia official-ni kosako matnanganiranga kakket ong·ja ine ma·sina man·aha ine West Garo Hills a·jani District Agriculture Officer K Sutnga parakataha.
Mominur Islam minggipa Agriculture Inspector (AI), PM-KISAN-ni ning·o game ge·e cha·giparangoniko verification-na tangka paisarangko gile ra·aha ine adita salrangna skangsan Selsella C&RD Block-ni ning·o game ge·e cha·enggipa mitam manderang, West Garo Hills a·jani District Agriculture Officer-na badi ka·doangahachim.
Indake ong·engon, game ge·e cha·enggipa manderangni badi ka·aniko man·soani ja·man matnanga man·gipa Agriculture Inspector-ko aro uni kosako badi ka·doanggipa manderangkoba District Agriculture Officer-ni office-ona okamatenba, sing·sandianirangko dakangaha aro iani bidingo sing·sandianirangko dakon, game ge·e cha·giparangoni darangba PM-KISAN scheme-ni verification-na tangka paisarangko gama dongjachim ine ma·sina man·aha.
“Uni gimin ia agriculture inspector-ni kosako matnanganiara pangchakani gri aro kakket ong·ja ine ma·sina man·aha. Saobasa an·tangni man·gnina songni manderangko ia officer-ni kosako matnange segipa chittio soi ka·ataha aro songni manderang mamingkoba ma·sichenggija soi ka·aha,” ine West Garo Hills a·jani District Agriculture Officer talataniko on·ataha.
Ia Agriculture Inspector-ni kosako matnange soi ka·gipa manderang an·tangtangba, ia official-ni kosako matnange segipa chittiko ra·pilna dorgastoko District Agriculture Officer-na see on·aha.
“Badi ka·ako man·gipa Agriculture Inspector, chingoniko tangka dabia dongjachim indiba saobasa chinga uni segipa chittio soi ka·genchimode Farmer’s ID card-ko man·gen ine chingko uni chittio soi ka·ataha,” ine Agriculture Inspector-ni kosako badi ka·doanggipa songni manderang parakataha.
