SHILLONG: A·dokni chadamberangna kam man·ani cholrangko bariatna gita Meghalaya State Language Act 2005-ni ning·o Khasi aro Garo ku·sikrangko official language dake ra·gatchina Hill State People’s Democratic Party (HSPDP), a·dok sorkariko didiangaha.
Posts Department (GDS Section)-ko man·chape ma·mong sorkarini dingtang dingtang office-rango Khasi aro Garo candidate-rangba kamrangko man·ani cholrang dongna gita certificate aro mark sheet-rangko Khasi aro Garo ku·sikrangona ra·chakna ia Act-ni Section 6-ni ning·o dingtangmancha u·iataniko on·china HSPDP didiangaha.
Iani bidingo HSPDP-ni dilgiparang, a·dokni Chief Minister Conrad K Sangma-ko grongenba agangrikangaha.
Da·o dipet gipin jatrangsa Gram Dak Sevak (rural postman)-ni kamrangko ka·engani a·sel gipin jatrangde songadam nokadamrango Khasi aro Garo ku·sikrangko man·pajae neng·nikanirangko chagrongna nangtokengani gimin iandakgipa kamrango Khasi aro Garo candidate-rangba kamrangko ka·pana man·na gita ia niamko taridapchina HSPDP, a·dokni Chief Minister-ko didiangaha.
HSPDP-ni parakatani gitade, songadam nokadamrango postman-rang, ku·sik aganna man·jaengani a·sel songni manderang baksa agangrikanio ma·sisretgrikanirang ong·enga aro kamrangkoba name ka·na man·jaengachim.
Khasi aro Garo ku·sikrangko official language dake ra·gatgenchimode ian songadam nokadamrango manderang baksa agangrikanirango neng·nikanirangko chel·atasan ong·aiigija a·doko kamgri ong·e dongna nangenggipa chadamberangnaba ma·mong sorkarini office-rango kamrangko ka·pana susana gita cholrangko on·ani ong·gen ine HSPDP-ni dilgiparang parakataha.
