SHILLONG: Adita jarangni gisepon ong·atnasienggipa Gambegre Assembly constituency-ni by-election-o a·dokni gitcham Minister Zenith Sangma-ni jikgipa aro Dengnakpara-ni MDC Sadhiarani M Sangma-ko Trinamool Congress (TMC)-ni candidate ong·e susaatna tik ka·angaha indiba da·o uamang TMC high command-ni ra·chakaniko sengengkua.
Iani bidingo kobor ra·timgiparangna u·iatengon, TMC-ni state president Charles Pyngrope aro TMC election committee-ni gipin membor-rang, Sadhirani Sangma-kon TMC-ni candidate-na tik ka·angaha aro uni bimingko high command-ona watatna tik ka·aha ine Sukrobar salo, TMC parliamentary party-ni dilgipa Mukul Sangma parakataha.
Gambegre by-election-na TMC-ni candidate-ko jinmana parakatna skang uamang, high command-ni ra·chakaniko sengkugen ineba ua aganaha.
Gambegre by-election-ko chena gita TMC-ni party worker-rang, constituency-o rakbee kamrangko ka·soengaha ineba Sangma parakataha.
“Chingo sakbonga MLA-rang donga aro ia sakbonga MLA-rangoni sakgnide skanggipa changna seokako man·gipa membor-rang ong·a. Gital political dolko rikanide altua kam ong·ja aro dingtang dingtang neng·nikanirangko chagrongna nangaia. Gital party-ko rikanio chakchikna nanga aro chingni ia gital par-ko rikanio ching baksa bakrimgipa mande sakantikon chinga mittelpilna ska,” ine Sangma aganaha.
Gambegre by-election-ko TMC chegen ine janapatengon, opposition dolrang TMC-ni kosako ong·gija dake biming man·atna jotton ka·ahachim indiba manderang iandake tol·e matnanganirangko bebera·jawa ine TMC parliamentary party-ni dilgipa Mukul Sangma parakataha.
