AMPATI: South West Garo Hills a·jani Rerapara songo gital rikgipa 33/11KV, 2X2.5 MVA Rerapara (Damalgre) Sub-Station-ko Bristibar salo, a·dokni Chief Minister Conrad K Sangma, kulie on·angaha aro ua sub-station-ko kulie on·angani somoio a·dokni Power Minister AT Mondal, Rangsakona MLA Subir Marak, Mahendraganj MLA Sanjay A Sangma aro gipin dilgiparangba dongpae bak ra·angaha.
Rerapara songo ia sub-station-ko rikna gita Asian Development Bank (ADB), tangka paisarangko dakchake on·aha aro ia Sub-Station-ko gong crore 6.19 koros ong·e rikaha.
Ia gital sub-station-o Damalgre aro uni wilwilao donggipa dingtang dingtang songrangna bijoliko on·na gita 2.5 MVA power transformer-ko ge·gni, control room damsa aro staff barrack damsako rikaha.
Rerapara-o ia gital 33/11KV sub-station-ko rikna skangde Damalgre, Mellim, Dengnakpara, Okkapara, Grenggandi, Rongbakgre aro uandakgipa songrangna Garobadha samba jolo donggipa Gongglanggre songni 33/11 KV sub-station-onikosa bijoli on·engachim.
Ia Sub-Station-ko kulie on·angani somoio a·dokni Chief Minister, jinmana aganprakangengon, ia sub-station-ko rikanichi jolni manderangna bijoliko nambate on·na man·gnok aro bijoli nosto ong·aniko komiatna gita bewalan dakchakani ong·gnok ine Chief Minister parakataha.
Songo noko bijoli on·aniko namdapatanichi dingtang dingtang karkanarangko kulie, songni manderangna kamrangko nakatate on·skana man·gen ineba ua aganaha.
Ia sub-station-ko kulie on·anganio a·dokni Power Minister AT Mondal-ba jinmana aganprakengon, ia project-ara Aggregate Technical & Commercial (AT&C)-ni gita noksan ong·aniko komiatna dakchakgen aro bijoli on·aniko bilakbatatgnok ine parakangaha.
