Secretariat-ona re·jomange sorkari baksa agangrika
SHILLONG: SSA skulrango skigiparangna 100 percent-chi dormahako bariatchina dabie batanggimin salskuna asonge jingjengatanirangko dakengon, skigiparangni dabianiko chu·sokatkujaengani gimin ia dabianiko chu·sokatkujaskal jingjengataniko dontongjawa ine All Meghalaya SSA School Teachers Association (AMSSASTA) parakataha.
Salskuna songe jingjengatahaoba maming aganchakanirangko on·kujaengani gimin Budbar salo skigiparang, uamangni asonge jingjengatenggipa biaponi, a·dokni Chief Minister Conrad K Sangma aro Education Minister Rakkam A Sangma-ko grongna Secretariat-ona re·jomangaha indiba chief minister aro education minister dongjani gimin association-ni dilgiparangko, a·dok sorkarini ku·wattimgipa Paul Lyngdoh, agangrikna okamatskaaha.
Lyngdoh-ko grongeani ja·man kobor ra·timgipa manderang baksa agangrikengon, “Secretariat-ona sokangon chief minister aro education minister, Secretariat-o dongja ine chingna kobor on·aha, uni gimin chinga sorkarini ku·wattimgipa baksa agangrikbaskaaha,” ine AMSSASTA-ni president Peter Thyrniang aganaha.
Thyrniang-ni kobor ra·timgiparangna parakatani gitade, SSA skulrango skigiparangni dabianirangko sorkari ma·sia aro iani bidingo education minister, chief minister-na seachi u·iatmanaha aro ua changsataie chief minister-na u·iattaina sienga ine Lyngdoh, skigiparangna parakataha.
Education department-ni adviser HM Shangpliang-ko grongchina gitaba Lyngdoh, uamangna ku·pattianiko on·atahani gimin uamang bakan Education department-ni adviser-koba grongna sienga ineba AMSSASTA-ni president parakataha.
“Shangpliang saksa Education department-ni adviser ong·a aro ua chingni dormaha bariatchina dabianirangko ma·siani gimin chinga ukoba grongna tik ka·aha,” ine Thyrniang aganaha.
SSA skulrango skienggipa sak 13000 manderangna 100 percent-chi dormahako bariatchina dabie AMSSASTA-ni ning·o skigiparang batanggimin salskuna asonge jingjengatanirangko dakengahachim ine nikna man·a.
“Chingni dabianiko chu·sokatkujaskal chinga chingni jingjengataniko dontongjawa,” ia AMSSASTA-ni president parakataha.
