TMC bypoll-ko chena ka·donga
TURA: Da·o Gambegre by-poll-o susaatenggipa uni jikgipa aro TMC candidate, Sadhiarani M Sangma-ko by-pollo chena ka·dongenga ine gitcham Cabinet minister aro Meghalaya Trinamool Congress vice-president Zenith Sangma aganaha.
“TMC ge·sasan aro ia by-poll-ko chena nisengenga. A·doko sason ka·enggipa NPP ia poll-rangko chena ka·oksienga aro uamangni man·a gita on·anirangkoba on·enga. Uamang ama cha·na kenenga. Indiba songni manderang Gambegre-o maming tang·doani dongjani gimin ruling party-na puonjawa” ine Zenith songbatna parakaha.
Gisik ra·na krabee, Sadhiarani, jean GHADC-o saksa mangmang me·chik MDC ong·enga, ua 2023 aro 2018 bilsirangni Assembly election-rango gnigipa ong·achim, jeon Saleng A Sangma changgnion cheaha.
Indita bilsirangna Gambegre-na simsakgijanina NPP-chi dilenggipa sorkariko dosi galengon, Zenith indine aganaha, “Bang·a songrangan, PMGSY-ni ning·o man·giparangna agre nama rama-sorokrang dongpaja. Healthcare aro education facility-rang namsrangja. Ringani chirang chu·ongja, indiba bilo dongenggipa party mamingnan simsakja.”
Game-ge·e cha·anio game cha·giparangni janggi tanganio neng·nikanirangko bikot-kolame aganengon, “bilo dongenggipa party kangal manderangko cha·boke cha·enga aro jolni game cha·giparangni, uamangni man·giminrangko nambata gadango palna-botna gita uamangna mamingkon dakja” ine TMC dilgipa matnangaha.
“A·ba o·e cha·aniko dontongatani ja·man, game cha·giparang cash crops ba dingtang bolam-biterangko ge·e cha·anirang jekai gue, cashewnut, ba uandakgiparangko ge·e-game cha·na gita nangaha. Indiba, batanggimin bilsirangonin, guerangko Myanmar aro Bangladesh-oni badingsrukanirang, game cha·giparangni man·gni damrangko komiataha jemangan uamangni man·na nanggipa damrangko man·jaengaha,” Zenith aganaha.
“Indake ong·engon, ia bilsini March 4 tariko ADM-ni ning·o iani bidingo sandirokchina gita rai on·ahachim, aro Resubelpara-ni DC aro SP-ko gipin biapona apjitataha. Iarangan bil gnanggiparangni kokkimaon indadakgipa badingsrukanirangko dakenga ine nikna gita man·a,” ua matnange aganaha.
