TURA: Citizenship (Amendment) Act 2019-ko ma·mong sorkarini ra·gataniara salgro salaram jolni Tribal manderangnade kragijani ong·a ine matnangenba, batanggimin bilsirango gitan knal December-ni 11 tarik Budbar saloba, North East Students Organisation (NESO)-ni gita salgro salaram jolni damsni a·dokrangon ‘Black Day’ ba ‘Andalgipa salko’-ko ong·atenga.
NESO-ni u·iatani gitade, Citizenship (Amendment) Bill 2019-ko salgro salaram a·dokrango songdongenggipa Tribal manderang jegalgrimtokahaoba, manderangni jegalanirangko knachakgija India sorkari, 2019 bilsini December 11 tariko, Citizenship (Amendment) Act 2019-ko Rajya Sabha-o pass ka·ahani gimin ia salko salgro salaram a·dokrango ‘andalgipa sal’ ine gisik ra·na Budbar salni bakoba ia salko ‘andalani sal’ ine manienga.
“Uni gimin ia andalani salko bilsiantian December-ni 11 tariko gisik ra·e NESO, Citizenship (Amendment) Act 2019-ko jegalangkuna tik ka·aha aro ia salo salgro salaramni pilak damsni a·dokrangon nisan gisim aro banner-rangko songgen,” ine NESO parakataha.
Citizenship (Amendment) Act 2019-ko salgro salaram jolni Tribal manderang maming dakeba ra·chakna man·jawa ine ma·mong sorkarina mesokna gitasa ia salko ‘andalani sal’ ine manienga ineba NESO-ni dilgiparang parakataha.
Ia salko andalani sal ine manienba, Citizenship (Amendment) Act 2019-ko jegalangkuchina gitaba NESO-ni dilgiparang, salgro salaram a·dokrango songdongenggipa pilak Tribal manderangkon didiataha.
Ia CAA-ara Bangladesh, Pakistan aro Afghanistan a·songni Hindu, Sikh, Buddhist, Jain, Parsi aro Kristianrangko a·songo songdongkamna bilko on·enggipa niamsa ong·ani gimin ia niamko a·songo aro mongsongbate Bangladesh a·songni sima ari jolrango donggipa salgro salaram a·dokrango songdongenggipa manderangsa mikkangchi neng·nikanirangko chagrongna nangskagnok ineba NESO talataniko on·ataha.
