SHILLONG: Re·baenggipa February jani 21 tariko ong·atna sienggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-o susagenma susajawa da·o dipet Trinamool Congress (TMC) doloni talatanirang dongkujaengoba, a·doko TMC be·gruroroangengahani gimin ia district council election-o susaani cholrang dongjaha ine kobor on·timgiparang u·iatskaaha.
Kobor on·timgiparangni parakatani gitade, TMC-ni state president Charles Pyngrope-ni constituency-on TMC-ni be·gruanganiko nikna a·bachengaha maina uni constituency-o bang·bata party worker-rangan Congress dolo napskana tarisamsotokengaha. Ia party worker-rang, TMC-ni state president Charles Pyngrope-koba uamang baksa Congress dolo napchina diditokenga ineba kobor on·timgiparang parakataha.
Iani bidingo talbate ma·sie ra·na jotton ka·ahaoba, TMC-ni Meghalaya in-charge Manas Bhuyan, state president Charles Pyngrope, TMC parliamentary party-ni president Mukul Sangma aro gipin dilgiparang, maming aganchakanirangko on·na siktokjaha.
Khasi aro Jaintia Hills a·jarango TMC-na pu·ongiparang komia ine adita salrangna skangsan, TMC-ni state president Charles Pyngrope ku·chakahachim aro district council election-o susaani gimin high command-oni maming u·iata dongkujaengani a·sel ia election-na tarisamsona man·kujaenga ineba aganahachim.
KHADC aro JHADC election-o susagniko TMC-ni dilgiparang tale aganna man·tokkujaengon, a·doko TMC-ni mongsongbatgipa dilgiparang, chong·motan Mukul Sangma aro Charles Pyngrope-ni gisepo agangrikanirang dongjaengani gimin ia district council election-o TMC susaani cholrang dongjaenga ine kobor on·timgiparang parakatskaaha.
2023 bilsini Assembly election-oba TMC, seat dambongakosan chena man·aiahachim aro untalan a·doko TMC dolko bilakbatatna man·chipjahachim. Da·o district council election-o susajana tik ka·aniara TMC-ko bilgribatata gitaba ong·engaha.
TMC-ni state president Charles Pyngrope-ni Nongthymmai constituency-o sak 1500-na baten TMC-ni worker-rang, Congress dolo napskana tik ka·aha ine adita salrangna skangsan Congress dolni dilgiparang a·kangatahachim.
 |
ReplyForward
|
