SHILLONG: Assam aro Meghalaya a·dokni simarango ong·enggipa golmalrangko namatchipna man·jaengon, a·dok damgnini gisepo meligrikna man·kujaenggipa dam 12 biaprangoni bangki dongkuenggipa damdok biaprango meligrikaniko ra·bana man·na gita Meghalaya a·dokni Chief Minister Conrad K Sangma, da·o February 21 tariko ong·atna sienggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-ni ja·man, Assam a·dokni Chief Minister Himanta Biswa Sarma-ko grongtaina sienga.
Sangma-ni kobor ra·timgiparangna parakatani gitade, adita salrangna skangsan ua Assam-ni Chief Minister baksa iani bidingo agangrikataha aro Assam-ni Chief Minister-ba uko, election-ni ja·man sakgni grongna gita tarikko tik ka·china aganataha.
Assam aro Meghalaya a·dokni Chief Minister-rang, bilsignina skangan ia gnigipa bakni agangrikaniko a·bachengatahaoba, Assam a·dokchipakni gisik nangbregija mesokengani a·sel, dolgnini gisepo agangrikanirang bon·chipa gita ong·engachim.
A·dok damgnichipaknin ia meligrikgijaniko namatna gita regional committee-rangko songahaoba, a·dok damgnini gisepo gronge agangrikanirang dongtaikujaengani a·selan kamrang ru·utroroskaengahachim.
Indake ong·engon, District council election matchotani ja·man a·dok damgnini Chief Minister-rang, apsan asonge agangriktaianichi, a·dok damgnini simarango ong·enggipa golmalrangko bon·atna man·gnok ine Meghalaya a·dokni Chief Minister Conrad Sangma, an·tangni ka·dongchakenganiko parakataha.
Assam aro Meghalaya a·dokni simarango bilsi 50 batpile meligrikna man·gijaniko namatchipna man·jaengani a·selan sima jolrango songdongenggipa manderang, dolgni dinggrikanirangchi neng·nikanirangko chagrongna nangtokengachim.
