TURA: Dadenggre Civil Sub-Division-ko district songe on·na ku·rachakahani gimin Garo Students Union (GSU) Western Zone (North) Dadenggre, a·dokni Chief Minister Conrad K Sangma-ko mittelpilangaha.
GSU-WZN Dadenggre-ni president Tengsan M Marak-ni parakatani gitade, 1999 bilsirangonin Dadenggre Civil Sub-Division-ko district songe on·china gita jolo songdongenggipa manderang aro dingtang dingtang dolrang dabitokengachim aro da·o Dadenggre Civil Sub-Division-ko district songe on·na gita Chief Minister Conrad Sangma-ni ku·rachakaniara, Dadenggre jolrango songdongenggipa manderangni ru·utbea bilsirangna dabianiko chu·sokate on·ani ong·engahachim.
“Dadenggre-ko district songchina dabianiara namen nangchongmotgipa ong·a aro iani bidingo ua name cholrangko sandigen ine chingna ku·rachakaniko on·ahani gimin chinga Chief Minister-ko mittelpilna ska. 1999 bilsirangonin Dadenggre jolrango songdongenggipa manderang dingtang district-na dabitokenga aro da·alo Chief Minister-ni ku·rachakaniko on·aniara chingna ka·donganiko ra·baani ong·aha,” ine GSU-WZN Dadenggre-ni president parakataha.
Dadenggre Civil Sub-Division-ko district songanio somoi nangkunaba gnang indiba ia dabianiko chu·sokatna ku·rachakaniara iana ja·ku de·chakatanian ong·aha ineba Marak parakataha.
Dadenggre-ko district songahaode, ia jolrango pilakni gitan namroro silroroaniko aro manderangni janggi tanganio dingtanganiko ra·bana man·gnok ineba GSU-WZN Dadenggre-ni president parakataha.
