SHILLONG: Polo Ground Shillong-o ‘Dorbar Iktiar Paidbah’-ko ong·atangaon Khasi Hills Autonomous District Council (KHADC) Administration of Elaka Amendment Act 2023 aro Khasi Social Custom of Lineage Amendment Act 2023-ni bidingo chanchirimangaha. Tom·anio Hima-ni representative-rang, Dorbar Shnong, Rangbah Shnong, Seng Kynthei, Seng Samla aro Khasi Hills-oni stakeholder-rang bak ra·angaha.
Uandake tom·anio Meghalaya-ni Governor CH Vijayashankar, drug ba pekgipa ringaniko jakkalaniko bon·atna ba dakgrikna ku·mikchetdilangaha. Governor, Meghalaya a·dokni chadamberangko drug-oni chel·e dongchina didiangahan baksa songsalni manderangko apsan ong·e drug jakkalako bon·atna kam ka·na ku·mongdilaha. Governor KHADC-koba jatna a·dokna kam ka·ani gimin de·mittelaha.
Indake ong·engon Deputy Chief Minister, Prestone Tynsong, aro KHADC Chief Executive Member, Pyniaid Sing Syiem- uamangba tom·anio mongsonggipa sokgipa ong·e bakko ra·aha.
Iarangni gisepon Governor, KHADC-ko Khasi ku·siktangona niamrangko pe·ani gimin, jurisdiction-ni ning·o ga·akgipa chu·gimik dam 54 Elakas-o donggipa dam 5,000 songrangko name dake nirokengani giin de·mittelaha. Unbaksana Autonomous District Council (ADCs)-ko a·dok sorkari baksa bakrime kam ka·na didiangaha.
Deputy Chief Minister Prestone Tynsong, tom·anio bakko ra·e aganprakmitingo, iandakgipa programko skanggipa changna nikenga aro bak ra·na cholko man·ani gimin kusi ong·aniko parakaha.
KHADC CEM Pyniaid Sing Syiem, Governor-ni uamangni programo bakko ra·anina mittelaha. Aro uamangni legislation-na ra·chakaniko jolan on·anina mittelangaha.
