SHILLONG: Khasi aro Jaintia Hills a·jarangode niam gri napsrukbagiparangna kenchake rel gari ra·baaniko champengsotokengon, Northeast Frontier Railway (NFR)-ni Rangiya division ning·o donggipa Mendipathar Railway Station-onade, skanggipa changna rel gario, bosturangko salbae on·angskaaha.
Ia bosturangara, Food Corporation of India (FCI)-ni merongrang ong·a aro ia merongrangko re·anggipa Mongolbar pringo, Mendipathar Railway Station-ona rel gario salbaaha.
Ia rel gari, Mongolbar pringni 9:20 bajimango, Mendipathar Railway Station-ona sokbaaha aro uandaken, merongrangko 9:40 bajimango, rel garioniko ra·ongkatenba, Garo Hills-ni dingtang dingtang biaprangona ra·angna gita truck garirangko gatataha.
Mendipathar railway station-ara Meghalaya a·dokni skanggipa railway station ong·a aro ia railway station-ko 2014 bilsini August 29 tariko a·bachengaonin, Garo Hills-ni manderang, mongsongbate Mendipathar jolrango songdongenggipa manderang bang·a namgnirangko man·engahachim.
Da·o ia railway station-ona bosturangko salbaahani gimin mikkangchi dingtang dingtang bosturangkoba ia railway station-ona salbaahaode bosturangni dam adita komiangnaba gnang ine ka·dongsona man·enga.
Meghalaya a·doko, mongsongbate Khasi aro Jaintia Hills a·jarango dingtang dingtang dolrang, niam gri napsrukanirangna kenchake, rel gari ra·baaniko jegaltokengon, rel project-rangko ra·chakchina ia dolrangko aro manderangko didianide a·dok sorkarini daitoan ong·a ine adita salrangna skangsan, Union Railways Minister Ashwini Vaishnaw aganahachim.
“Indita tangka paisani project-ko chu·sokataniara ma·mong aro a·dok sorkari dolgnini daitoan ong·a indiba a·dokni manderangko aro dingtang dingtang dolrangko didianide a·dok sorkarini daitoan ong·a,” ine Union Minister aganahachim.
Rel project-ko Meghalaya a·dokni manderang ra·chakna man·jaenga ong·ode ia project-ko Union Railways Ministry den·galpilna tik ka·angaha ine adita salrangna skangsa, New Delhi-o Union Railway Minister Ashwini Vaishnaw-ko gronge agangrikani ja·man, Meghalaya a·dokni Chief Minister Conrad K Sangma parakatahachim.
