TURA: Meghalaya a·doko Bharatiya Janata Party (BJP), jatni sason ka·ani aro daka rikani bewalrangko mangrakbatatna kamko ka·engani gimin BJP-mangmangchisan district council-rangni gimagimin mikkim rasongko man·piltaina amaigen ine Bristibar salo, BJP-ni state vice president aro Tura-ni MDC Bernard N Marak a·kangataha.
“BJP-de Tribal ba Kristianrangni kosako chakatgipa party ong·ja. Congress sorkarini somoio ANVC dolrangni songgigrikaniko Congress aro gipin dolrang bilsi 10-na baten bon·chipate donchaaha aro uamang batanggimin somoirango a·dokni autonomous district council (ADC)-rangkoba nosto ka·aha,” ine Marak matnangataha.
District council-rangni miksonganiara Hill District-rango songdongenggipa a·brini Tribal-rangna jakgitelani bilko on·na miksonganisa ong·achim ine janapatengon, “An·ching pagitchamrang maming dakeba gipin a·songni dilgiparangna aro skia man·gipa manderangna bame on·jaha indiba Tribal-rangni bilrangko a·doko Congress chalaiani ja·mansa nosto ka·aha. Uamangan Indian Constitution-ni Article 243ZC-ko pe·e Hill District-rango Municipality-ko a·bachengataha,” ine BJP-ni state vice president parakataha.
Batanggimin bilsirango Congress dolan, district council-rangni mongsonggipa department-rang, jekai Forest, Revenue aro uandakgipa department-rangko a·dokna on·e district council-rangko bilgriataha ineba Marak matnangataha.
“Indake ong·genchimoba, Sixth Scheduled a·jarango ADC-rangko bilakatpiltaina gita BJP ja·kuko de·ahani gimin 2014 bilsio ANVC dolrang baksa ma·mong sorkari, Union Home Minister Rajnath Singh aro Minister of State (Home) Kiren Rijiju-ni mikkango songgirike soi ka·grikaha,” ine Marak parakataha.