TURA: Batanggimin sal somoirango dingtang dingtang biaprangoniko motorcycle cha·uanio jak donganina Tura-ni police-rang, mande sakgniko rim·dapna man·aha.
Adita salrangna skangsan, India a·songoniko motorcycle cha·uenba Bangladesh-ona badingsrukatenggipa dolni mande sakbongako North Garo Hills a·jani police-rang, rim·na man·ahachim.
Motorcycle cha·uanio jak donggipa manderangko rim·na sandiangkuenba police-rang, mande sakgniko Bristibar salo, Assam a·dokni Goalpara-oniko rim·dapna man·aha.
Police-rangni u·iatani gitade, ia mande sakgniara, cha·ugimin motorcycle-rangko pale galna skang, tol·gipa number plate-rangko taritime on·giparang ong·achim.
Rim·ako man·gipa mande sakgniara, Assam Goalpara a·jao donggipa Moghopara-oni bilsi 23 ong·gipa Charles D Momin aro Assam Goalpara-oni bilsi 25 ong·gipa Rezabul Hoque ong·a.
Meghalaya a·dokni dingtang dingtang biaprango bike aro scooty cha·uanirang batroroengani gimin batanggimin sal somoirangonin police-rang, bike aro scooty cha·ugiparangko bilakbate am·sandienba, da·o cha·ugiparangko bang·en rim·na man·engaha aro ia cha·ugiparangoniko, bike aro scooty-rangkoba man·pilengahachim.
