SHILLONG: Re·baenggipa 2027 bilsio chang 39-gipa National Games-ko Meghalaya a·doko sokachakskana siengani gimin Indian Olympic Association (IOA)-ni nisanko Sukrobar salo, Union Home Minister aro IOA-ni president PT Usha, a·dokni Chief Minister Conrad K Sangma-ni jako pakwate on·ataha.
Chang 38-gipa National Games-ko Uttarakhand a·doko matchotatanio, IOA-ni nisanko Meghalaya a·dokna pakwate on·atskaaha.
2027 bilsini National Games-ko Meghalaya a·doko sokachakaniara a·dokna namen gisik ra·beani somoi ong·gen maina ia apsan bilsion Meghalaya a·dokni bilsi 55 gapanikoba manina siengachim.
IOA-ni nisanko Meghalaya a·dokna pakwate on·atanio Union Home Minister Amit Shah, jinmana aganprakatengon, 2027 bilsio chang 39-gipa National Games-ko salgro salaram jolrango kal·anirang baksa Meghalaya a·doko dingtange sokachakna sienga ine parakataha.
Ia National Games-ni bang·bata kal·susaanirangkon Meghalaya a·doko ong·atgenchimoba mitam kal·anirangkode salgro salaramni gipin biaprangoba ong·atna miksongenga aro ian namen dingtangmanchagipa ong·gen ine Shah aganaha.
Chang 39-gipa National Games-ko sokachakanio ua Meghalaya a·dokna an·tangni namgipa skanikoba parakataha.
IOA-ni flag-ko ra·chakanio, a·dokni Chief Minister baksana Sports & Youth Affairs department-ni Commissioner & Secretary Dr Vijay Kumar D, Meghalaya State Olympic Association (MSOA)-ni president John F Kharshiing, kal·susagiparang aro coach-rangba dongpaaha.