TURA: Bristibar walo, South West Garo Hills a·jani Garobadha jolo donggipa Harigaon bazar-o chu dokkan nokgipako kragija dake dokahani gimin aro uko be·gimin botolchi su·na jotton ka·ahani gimin police-rang, dos dakgipa mande sakgniko rim·aha.
Dos dakanina rim·ako man·gipa mande sakgniara Sangkaregre songni Uttam Arengh aro Harigaon songni Darmen minggipa manderang ong·achim.
Police-rangni u·iatani gitade, iani bidingo dokako man·gipa mandeni FIR-ko man·soani ja·man Garobadha Police Outpost-o mokordoma ka·enba, dos dakgipa mande sakgnikon rim·aha.
Chadrapako man·gipa mandeara Bolganggre songni Manob Ch Marak ong·achim aro uni police-rangna FIR ka·ani gitade, re·anggipa Bristibar walni 7:50 bajimango, mande sakgni, uni chu dokkanona re·baenba, tangka gamgija chu on·china dabiaha. Ua, uamangna chuko on·na jechakon uamang, uni chu dokkanko chipdrana jotton ka·aha aro ua uamangko champengon, uamang uko botolchi dokataha aro be·gimin botolchi uko su·na jotton ka·enba, uni sko aro oksiko mata bu·aniko man·ataha ine dokkan nokgipa FIR-o parakaha.
Doka man·gipa mandeko ja·mano Garobadha PHC-ona rimange sanna bananirangko on·aha aro dos dakgipa mande sakgnikon police-rang rim·na man·aha.
