TURA: Meghalaya a·dokara Indian Constitution-ni Sixth Schedule ning·o ga·akgipa a·doksa ong·e, dingtangmancha niamrangchi chel·chakako man·gipa biap ong·ani gimin skulrango Automated Permanent Academic Account Registry (APAAR) ID-rangko jakkalchina Education department-ni ge·etaniara kraani ong·ja ine South Garo Hills a·jani social activist Greneth M Sangma parakataha.
“Meghalaya a·dokni skulrango APAAR ID-rangko jakkalna Education department-ni parakataniara, Supreme Court-ni chatro chatrirangna on·gimin bilko pe·ani ong·enga, maina Meghalaya a·dokara Indian Constitution-ni Sixth Schedule ning·o ga·akgipa a·doksa ong·e dingtangmancha niamrangchi chel·chakako man·giparang ong·a. Ia Sixth Schedule-an Meghalaya a·doko songdongenggipa Tribal jatrangni daka rikani, bebera·ani aro kamrangko chel·chakgipa ong·a aro APAAR ID-rangko ra·gataniara Tribal-rangni jakgitelani aro bilrangko pe·ani gita ong·enga,” ine Sangma parakataha.
A·dokni skulrango APAAR ID-rangko ta·raken jakkalchina ge·etaniara chatro chatrirangni lekka porako ra·anio nangchakeaniko ra·bana jajrengchakanikoba ra·baaha ine janapatskaengon, APAAR aro Aadhar baksana gipin tracking system-rangko ra·gatani a·selan a·doko, mongsongbate songadam nokadamrango poraianirangko dontonganiba batroroangaha ine Sangma parakataha.
Indake ong·engon, skulrango Aadhar card-rangko nangatgija chatro chatrirangna gipin cholrangko jakkalskachina, SSA skulrango dropout rate-ko komiatna gita pilak nanga dakchakanirangko chu·onga gita on·china, chatro chatrirangni poraia dontonganiko champengna nambate nirok sandianirangko dakchina aro skulrango lekka pora on·aniko namdapatna gita ma·a paarang, skigiparang aro chatro chatrirangni gisepo apsan agangrikanirangko dakchina gita Sangma didiataha.
