TURA: South Garo Hills a·jao Sibbari-oni Silkigre-ona dakanggipa ramako name Tarija ine Garo Students Union (GSU) matnangatenba, iani bidingo PWD (Roads) Baghmara-ni Executive Engineer-na badi ka·e sedoataha.
Ia ramako tarigipa contractor-ni kosako jegalatengon, Sibbari-oni Silkigre-ona tarigipa ramao blacktopping on·aniba chu·ongja ine GSU matnangatenba, ia kamrangko ta·raken nirokechina, South Garo Hills a·jani Deputy Commissioner, Chokpot Civil Sub-Division-ni SDO, PWD official-rang aro dingtang dingtang dilgiparangkoba didiataha.
GSU-ni badi ka·doangani gitade, ia ramako tarianio, naptomgimin culvert-rangkoba tarijaha aro ramarango retaining wall-rangkoba tarijahachim.
A·dap dolongoni Chengba dolongna aro Dareng chibimako dam kana nanggiparangba kajaha ine matnangatengon, ia ramako black topping on·e tariengmitingoba cement aro chirangko chu·onga gita on·e tarijaha ine GSU parakataha.
Ia ramako skatangsa tariaha ine janapatengon, ia ramako ta·raken nipilenba, matchotgija donenggipa kamrangko matchotatchina GSU, PWD official-rangko didiataha.
