Baghmara: South Garo Hills-oni MLA-rang mejaomangmang Railway-ko Baghmara-ona tariangchina mol·molaniko A’chik Holistic Awakening Movement (AHAM) Southern Zone, namnikgijako parakate, ian niamgri napsrukaniko bariatgen ine kenchakaniko janapaha.
Chief Minister Conrad Ka Sangma-na seatgipa chittio AHAM, da·oni obostako janapate aro mikkangchi railway-ko Baghmara-ona tarianga ong·ode, ian niamgri napsrukaniko bariatgen ine janapaha.
Railway-ko ra·bana miksonganiko jegalja indiba maming chelchakani gri indaka somoio Railway-ko ra·baa ong·ode, Garo Hills a·jao songdonggiparangna namen kengni ong·gen ine AHAM, aganaha.
“Kenchakani mongsonggipade niamgri napsrukgiparangni gimin ong·a. Meghalaya-o niamgri napsrukaniko champengna regulatory mechanism bak maming bilakgipa niam dongja. Jeni a·sel niamgri napsrukanirangko Garo Hills-ni dingtang dingtang bakrango nikna man·enga. Gipin biaprangoni re·bae business ka·giparang, niamgri songdonggiparang batrikrikengako nikengon a·jani manderang neng·nikako man·enga.”
Niamgri napsrukaniko champengna maming niamko ra·gatchenggija, Baghmara-ona railway-ko ra·baa ong·ode obosta nambatjawa.
“Railway-ko tarianga ong·ode niamgri napsrukgiparangna napna altubatgnok, ian South Garo Hills-ni demographic structure-ko namen dingatangatgnok. Napsrukna altugipa border ba sima ari aro rakgipa niamrang dongjani a·sel Baghmara-ni manderangna aro uamangni a·a, gam-jinrang gimaana bilongen kenchakani donga ine AHAM aganaha.
Railway project-ko ra·baani palo sorkari, NH 217 ramako namdapata ong·ode nambatgen, jekon batanggimin bilsi 53-oni nichange donenga ine CSO aganaha.
“Infrastructure development jekai nambata rama, dolong aro public utility, healthcare facility, educational institutions aro jolni manderangna kamrangko bikote on·nanio kam ka·ode nambatgen.”
