SHILLONG: A·dokni Maternity Mortality Rate (MMR) ba ma·giparangni an·pako sianiko a·dok sorkari, 40 percent-chi komiatna man·aha ine Sombar salo, a·dokni Chief Minister Conrad K Sangma parakataha.
Assembly-o maternity leave ba an·o donggipa me·chikrangna on·enggipa chuttini gimin sing·anirangna aganchakaniko on·angengon, 2018 bilsio MDA-I sorkariko rikchengaonin a·dok sorkari, ma·giparangni an·pakanio sianiko komiatna krenge kamko ka·enga ine Chief Minister aganaha.
“Bilsidokna skang a·dokni MMR, national average-na changgni batachim indiba dingtang dingtang ja·kurangko de·anichi chinga MMR-ko 40 percent-chi komiatna man·aha. Da·o a·dokni MMR, a·songni MMR baksa apsangrikaiengaha,” ine Sangma aganaha.
Iana skang, sorkario kam ka·enggiparangna on·enggipa maternity leave-ni bidingo talataniko on·angengon, maternity leave-rangko Meghalaya Fundamental Rules & Subsidiary Rules 1984 (amended)-ni Subsidiary Rule 111-ni ning·o tariaha ine Chief Minister parakataha.
Bi·sa sakgni donge an·o donggipa me·chikrang, sal 120 maternity leave-ko ra·na man·a aro anti 20-na an·o donge oko bi·sa sichipgipa ma·giparangnade sal 120-na bateba maternity leave-ko on·na man·a ine Chief Minister aganaha.
“1984 bilsini February 14 tarikoni 2009 bilsini December 22 tarikonade maternity leave-ko sal 90-san on·aiachim. 2009 bilsini December 23 tarikoni 2017 bilsini December 7 tarikonade sak 90-oni sal 120-ona bariate da·o 2017 bilsini December 8 tarikonide sal 120-oni sal 180-ona kingking bariataha,” ine Chief Minister talataniko on·angaha.
Private company-o kam ka·enggipa me·chikrangnade Maternity Benefit (Amendment) Act 2017-ni ning·o man·gopskaa ineba Chief Minister aganaha.
Da·o dipet sorkarini niamrango non-regular, casual, contractual, adhoc aro muster roll-rangnade maternity leave dongjani gimin ‘Maternity Benefit Act 1961’-ko taridapgipa Maternity Benefit (Amendment) Act 2017-ni ning·o chuttiko on·skagen ineba Chief Minister parakataha.