AMPATI: India a·songo donggipa dingtang dingtang jatrangni daka rikani aro chrokanirangko nie ma·sie ra·na man·na gita Sukrobar salo, ‘Bharat Ko Jano’ program-ni ning·o dingtangmancha Border Area Program-ko South West Garo Hills a·jani Nogorpara songo donggipa Katta Beel-o ong·atangaha aro ia program-ko North East Zone Cultural Centre (NEZCC), Meghalaya sorkarini Art & Culture department baksa nangrime ong·atangaha.
Ia Border Area Program-ko ong·ataniara Meghalaya, Chhattisgarh, Nagaland aro Assam a·dokrango donggipa dingtang dingtang jatrangni daka rikani aro chrokanirangko nie aro ma·sie ra·na namgipa chol ong·aha aro ia program-ko ong·atanio, India aro Bangladesh a·songni simarango donggipa dingtang dingtang jatrang aro Nogorpara songni wilwilao donggipa manderangba bak ra·angtokaha.
Ia Border Area Program-ko ong·atanio A·chikrangni Wangala chrokni, Kochrangni Hoko chrokani, Assam-ni Bihu, Chhattisgarh a·dokni Ditong Endana ba Gedi chrokani aro Nagaland a·dokni Sumi Nagarangni chrokanirangkoba mesokangaha.