SHILLONG: Re·baenggipa 2026 bilsio ong·atna sienggipa Garo Hills Autonomous District Council (GHADC) election-oba a·dokni Bharatiya Janata Party (BJP) susataina tik ka·angaha.
Iani bidingo kobor ra·timgipa manderang baksa agangrikengon, “Election-rango susajagenchimode chingni political party ong·aniara mai namgni?” ine BJP-ni dilgipa aro a·dokni Cabinet Minister AL Hek parakataha.
2021 bilsini GHADC election-oba BJP, gimik dam 21 seat-rango susaaha indiba Tura aro Barengapara constituency-rangosan chu·sokgipa ong·aiahachim.
2021 bilsini GHADC election-o BJP-ni Bernard N Marak, Tura GDC Constituency-o susae chegipa ong·aha aro Barengapara GDC Constituency-o BJP-ni Pramod Koch chegipa ong·skaahachim.
Indake ong·engon, ma·mongo BJP-chi dilenggipa NDA sorkarini ra·gatna miksongenggipa ‘One Nation, One Election’ policy-naba BJP Minister AL Hek chakpaaniko parakataha.
“Angni nikaniode One Nation, One Election-ara nambatgipa chol ong·enga maina Lok Sabha aro Assembly election-rangko apsan somoio ong·atachi korosrangko bang·en komiatna man·gen,” ine Hek aganaha.
Dingtang dingtang election-rangko ong·atanio, model code of conduct (MCC)-ko ra·gatna nange bang·a changon sorkarini kamrangko champengata gita ong·ronga ineba ua aganaha.
“Sorkarini kamrang ja·donggaatako man·on sana gimaani ong·enga? Uan a·songni manderangnan gimaanide ong·aia,” ine ua aganaha.
