Tura: District Legal Services Authority, West Garo Hills, Tura, Meghalaya State Legal Services Authority baksa bakrimenba Sonibar salo Tura Reserve gittimni Community Hall-o Legal Awareness Program-ko ong·atangaha. Ia program-ona West Garo Hills, Tura-ni Circular Inspector (Sadar) Shri Bitching N Marak, DLSA, West Garo Hills Tura-ni Assistant Legal Aid Defence Counsel, Shri Jingjang Ch Marak, aro gittim-ko nirok simsakenggipa Development Committee-ni President, Secretary baksana jolo songdongenggipa bang·a ma·a parang program-o bakko ra·angtokaha. Ia awareness program-ona mongsonggipa ong·e sokgipa Shri Bitching N Marak, jinmana aganprakengon, ia somoini bako A·chik a·songni dingtang dingtang biaprango dal·drobaenggipa chadamberangni pekatgipa bosturangko jakkale an·tangtangni be·en bimangko nosto ka·engani gimin aro ia pekatgipa bosturangko jakkale nokdangna, songsalna kratcha·aniko, rasong be·aniko ra·bae ong·siatenganina iani bidingo bang·a dakna nanggni kamrangko tom·anio talate on·angaha. Ia sal somoirango skul aro college-rango poraienggipa me·a aro me·chik chadamberang bang·bataan ia pekatgipa bostuko jakkalanio ma·a parangni aro mama adarangni nirok simsakna daito ra·jani a·sel songsalo iandakgipa kamrang giproroenganina Pa Marak songsalo donggipa pilak ma·a parangkon aro gittim antiko dilenggipa sakantinan mikrakatani kattarangko u·iataha.
Unbaksana ia pekatgipa bosturangko jakkalanio apsan bijirangko jakkale chadamberang ni AIDS sabisiko altuae man·enganiko nikengon dingtang dingtang rokomni drug ba pekatgipa bosturangko Tura-ni wilwilao badinganiko dondipatna gita gittim ge·antini Development Committee aro songsalo dongenggipa sakantikon ku·cholsan ong·e ja·ku de·na gita Pa Marak didiangaha.
