TURA: Ru·utbea bilsirangna a·bachengna man·chipgija dongenggipa Baljek Airport-o 20 seater aircraft ba ge 20 asongchakani donggipa sildorengrangko chalaina gita Mongolbar salo a·dok sorkari, Operations & Maintenance (O&M) & Communications, Navigation & Surveillance/Air Traffic Management (CNS/ATM)-na Airports Authority of India (AAI) baksa songgigrike soi ka·grikangaha.
Ia airport-o ge 20 seat donggipa sildorengrangko chalaina AAI baksa sorkarini songgigrikaniara, Garo Hills-o donggipa manderangna songre songgabatanio nambata cholrangko on·ani gita ong·enga.
Ia songgigrikaniara, Baljek Airport-o chonchongipa sildorengrangko onchongatna cholko a·bachengatengasan ong·aigija, mikkangchi ia airport-o ATR-72 operation baksana gipin dal·dalgipa sildorengrangko chalaina man·na gita ia airport-ko dal·batatna cholko on·aniba ong·enga.
Ia Baljek Airport-o ge 20 seat donggipa sildorengrangko chalaina AAI baksa songgrikanio, a·dokni Chief Minister Conrad K Sangma, Dadenggre-ni MLA Rupa M Marak, Meghalaya Industrial Development Corporation (MIDC)-ni Chairman James PK Sangma, West Garo Hills a·jani Deputy Commissioner Vibhor Aggarwal aro AAI-ni official-rangba dongpae bak ra·angaha.
Ia soi ka·grikanio a·dokni Chief Minister, tom·anio bak ra·giparangna aganprakangengon, ia salo AAI baksa songgigrikanio soi ka·grikaniara, Baljek airport-o chonchongipa sildorengrangko bilchakatatna ja·ku de·ani ong·aha ine parakataha.
Ia soi ka·grikaniara, ia airport-o ATR-72 sildorengrang baksana dal·dalkalgipa sildorengrangko jakkalna krenge kam ka·anio ia airport-ko dal·batatna cholko oe on·ani gitaba ong·enga ineba Chief Minister aganaha.
“Ia biaprangara, samba jolrango donggipa a·songrangona sepangbatani gimin Baljek Airport-ko anga bang·en cholrang donggipa airport gita nikenga. Ia airport-ko chalaina ja·ku de·chakataniara mikkang bilsi 30-50-mangna niksamsoanio pangchakaniko songaniba ong·enga,” ine Sangma, ia airport-ko chalaina gita AAI baksa soi ka·grikna man·ahani gimin a·dokni Transport department aro AAI-na an·tangni namgipa skanirangko on·ataha.
Ia airport-ko jako ra·na gita kusi ong·aniko parakangskaengon, Phase-I-na skang on·gipa acre 56.5 a·arang baksana acre 125 a·arangko aro Phase-II-na acre 115 a·arangko on·dapchina AAI-ni official-rang, a·dok sorkariko mol·molangskaaha.
