Tura-o Indian Armed Force-rangko mande ra·na Tiranga Rally-ko ong·ata

TURA: India-ni sipairangko mande ra·pilskana Sonibar salo West Garo Hills Tura-o dal·begipa Tiranga Rally-ko ong·ataha. Tura  GDC constituency-ni MDC Bernard N Marak, West Garo Hills-ni manderang baksa rally-ko dakdilangaha.
Manderang, National flag ba a·songni nisanko jako ra·e Tura-ni ramarango re·jome, a·songko chelchakna dakgrikgipa sipairangna mande ra·aniko mesokangaha. District Auditorium-oni a·bachengate Tura bajar, Hawakhana, Ringre-ko nappake rally ka·angaha.
Indake tom·anio aganprakmitingo Bernard Marak, India-ni military force ba chelchakgipa dolrangni a·songko chelchakna kam ka·enganina mittelangaha. India maming saloba bobil dolna bame on·jawa, ine aganaha.
Rally-ni ja·man duty-o sianggipa sipairangni janggina bi·chakaniko dakangaha.
India aro Pakistan-ni gisepo nanggrikao, a·songtangna ka·dongbee warachakgipa  dingtang dingtang India-ni Defence Force-rangko gisik ra·e uamangna mande ra·pilskaaniko mesoke, Meghalaya Trinamol Congress-ni gitaba dilanganiko dake, Soliditary March ba soroko re·jomaniko dakangaha. India-ni Flag-ko ra·enba, Tura William Point-oni a·bachenge Tetengkol rama bibragita re·angenba  bon·chote TMC Office nokona re·jomaniko dakangaha.
Opposition dolni dilgipa Dr. Mukul M. Sangma, rally-o bak ra·angaha aro unbaksana gipin sak 300-na batgipa manderangan ia tom·anio donge bakko ra·angtokaha. Dr. Mukul M. Sangma, jinmana aganprakangengon, ‘A·gilsak gimikchin ong·na sipile dakgrik dinggrikanirang ong·engon aro so·sojengjeng ong·e janggi tangna nangengon, ia salni bako ku·cholsan ong·e A·chik a·songni tom·tomanina aro gipin dakgrik dinggrikenggipa a·songrangnaba  bichakaniko dakna aro an·chingni India a·songna janggitangko on·chake ka·dongbee a·songko warachakgipa Indian Army, Indian Navy, Indian Air Force aro chelchakgipa dolni sipairangna mande ra·pilskaniko mesokna  tom·aniko ong·ataha. A·songo so·sojengjeng ong·ani a·selrangara a·songko dilenggiparangni  sason ka·anio bilgriani aro kakket ong·gijani gimin ong·a, uni gimin an·chingni a·songko sason ka·enganio kakketani aro ku·mong nangrimani dongna nangchongmota unosa an·chingni a·songara silroro namrorogipa aro tom·tomgipa ong·na man·a ineba  Sangma aganangaha.