TURA: South West Garo Hills a·jao Meghalaya Police-ni kamna Robibar salo porikka seatahani gimin A·chik Holistic Awakening Movement (AHAM) South-Western Zone (SWZ) Ampati jegalataha.
“Meghalaya Police-ni kamna South West Garo Hills a·jani Ampati-o porikka seaniko June 1 tarik Robibar salo ong·atahani gimin chinga suk ong·gijaniko parakna ska. South West Garo Hills jolrangara Kristianrang bang·batgipa biap ong·a aro ian skanggipa changna Robibar salo porikkarangko seatani ong·enggen ine chinga bebera·a. Meghalaya a·doko Robibar salara sorkarini chuttini sal ong·an baksana Kristianrangnade rongtalgipa aro neng·takani salsa ong·e Nokgipako olakkiani salsa ong·a. Robibar salo iandake porikkarangko ong·ataniara Kristian candidate-rangni aro uamangni nokdangrangni toromo bebera·aniko golmal ka·ani gitaba ong·aha. Iandakgipa porikkarangko Sonibar ba je saloba ong·ataichina indiba Robibar salo ong·atanikode chinga raken jegala,” ine AHAM-SWZ Ampati-ni president Wester G Sangma parakataha.
Mikkangchide iandakgipa porikkarangko Robibar salrango, mongsongbate Kristianrangni songdongchakgipa biaprango ong·atjachina aro Kristianrangni bebera·aniko mande ra·china gitaba AHAM, a·dok sorkariko didiataha.
