SHILLONG: Shillong Medical College-ni academic session-ko ia bilsini gisepon a·bachengna siengahani gimin pilak kamrangkon da·o matchotangengaha ine a·dokni Health Minister Ampareen Lyngdoh parakataha.
Tura Medical College-ko rikani kamrang matchotangengaha ineba Lyngdoh parakataha.
Shillong Medical College-ni academic session-ko a·bachengna gita kamrang matchotangengaha ine janapatengon, Shillong medical college-ko ta·raken kulina man·na gita a·dokni Chief Minister Conrad K Sangma, pilak nanga kamrangko matchotatna nangnikenga ine Health Minister aganaha.
“NEET-ni parakatgimin gita chinga somoi gitan counselling-ko dakna ka·dongenga. NEET counselling-ko ta·raken a·bachengchina gita Shillong Medical College-na u·iataniko on·manaha,” ine Lyngdoh, kobor ra·timgiparangna aganaha.
NEET Counselling-na u·iataniko bakan chapa ka·atgnok ineba Lyngdoh parakataha.
Health Minister-ni u·iatani gitade, Shillong Medical College-ko North Eastern Hill University (NEHU)-ni ning·o bak ong·atani kamrang aro register ka·ani matchotmanaha aro da·o academic session-ko a·bachengna gita Letter of Permission (LoP)-nasa sengaiengaha.
Mongsonggipa department ge·gnina da·o interview-rangko ra·engaha aro skigiparangko ra·na gitaba kamrangko ka·engaha ineba ua aganaha.
Academic session-ko a·bachengatna ku·rachakaniko on·angengon, course-rangko a·bachengna gita LoP-ko nangchongmota ine Health Minister aganaha.
Indake ong·engon, Tura Medical College-ko rikani kamrang da·o 78%-ni gita matchotaha aro Tura Medical College-ko public-private partnership (PPP) mode-o chalaina gita sorkari kamko ka·enga ineba Lyngdoh parakataha.
Tura Medical College-ko chalaina gita namgipa company-ko man·ahaon, re·baenggipa bilsiode ia medical college-ko a·bachengna man·gnok ineba Lyngdoh aganaha.