SHILLONG: Meghalaya a·doko Inner Line Permit (ILP)-ko ra·gatna man·na gita dakchakaniko on·china Shillong-ni Voice of the People’s Party (VPP) MP Ricky SJ Syngkon, Union Defence Minister Rajnath Singh-ko mol·molangaha.
ILP baksana Khasi ku·sikko Indian Constitution-ni Eighth Schedule-o chapatna gitaba dakchakaniko on·china Shillong-ni Lok Sabha MP, Union Defence Minister-ko mol·molataha.
Meghalaya a·doko Bangladesh a·songoni niam gri napsrukbae songdong a·chaanirang batroroengani a·sel Tribal manderangni chagrongna nangenggipa neng·nikanirangko janapatengon, a·dokona niam gri napsrukanirangko champenganio pilak nanga dakchakanirangko on·china Syngkon, ma·mong sorkariko didiangaha.
Niam gri napsrukanirangko champengna gita bilakgipa niamrang dongjani a·selan Meghalaya a·doko dingtang dingtang jatrangni daka rikanirangna, a·ani kosako man·enggipa bilrangna aro Tribal-rangni janggi tangani cholrangna kenchakna nangani ong·enga ineba ua aganaha.
Arunachal Pradesh, Mizoram, Manipur aro Nagaland a·dokrangode ILP-ko ra·gatmanaha ine janapatengon, Meghalaya a·dokoba ILP-ko ra·gatchina gita a·dokni manderang, ru·uta somoirangonin dabitokenga ine Shillong MP, Meghalaya a·dokoba ILP-ko ra·gatna cholko on·china Home Affairs Ministry-ko didiataha.
Khasi ku·sikko Constitution-ni Eighth Schedule-o chapatchina dabienggipani gimin janapatskaengon, Khasi ku·sikko Eighth Schedule-o chapatna gita pilak niamrangkon chu·sokatmanahaoba da·alonan Khasi ku·sikko nichanggalengkua ine Syngkon parakataha.
Meghalaya a·doko donggipa dingtang dingtang sipai dolrango, joltangni Tribal chadamberangnaba kamrangko ka·e cha·na gita cholrangko on·chinaba Shillong MP didiangaha.
Indian Institute of Tourism & Travel Management Shillong centre-ko chu·gimik jakgitelgipa institute dake ra·doatchina gitaba Shillong MP, ma·mong sorkariko didiangaha.
UDAN scheme-ni ning·o dontongatgipa sildoreng bilruraanirang, jekai Shillong-Dimapur, Shillong-Silchar aro Shillong-Agartala flight-rangko a·bachengpiltaichina gitaba Shillong-ni VPP MP, ma·mong sorkariko didiangaha.