TURA: Tura Medical College-ko Public-Private Partnership (PPP) mode-o chalaina sorkarini tik ka·engani gimin Tura Garo Senior Citizens Forum (TGSCF) jegalatenba, ia college-ni chu·gimik bakkon sorkarichi chalaichina a·dokni Chief Minister Conrad K Sangma-ko didiataha.
Iani bidingo a·dokni Chief Minister-na sedoatengon, ia college-ko da·onan matchotgija dongchipanian kratcha·na nangani ong·a aro da·o ia medical college-ko private company baksa bakrime chalaina tik ka·aniara Garo Hills-ni manderangna on·enggipa cholko ra·e katani gita ong·enga ine TGSCF parakataha.
“Shillong Medical College-kode chu·gimikan sorkarichi chalaina tik ka·enba maini gimin Tura Medical College-kode PPP mode-o chalaiskana miksongenga? Tura-ni manderangde sorkarini dangdike on·ako man·na krajama?” ine TGSCF sing·doataha.
Tura Medical College-ko PPP mode-o chalaina miksongenganiko batanggimin somoirangonin Garo Hills-ni dingtang dingtang dolrang jegaltokengoba iani bidingo a·dok sorkari, dingtangatna miksongani ba ja·ku de·anirang dongkujaengani giminba TGSCF, suk ong·gijaniko parakataha.
Adita salrangna skang, a·dokni Health Minister Ampareen Lyngdoh-ni parakatgipa kattarangna aganchakaniko on·angengon, Garo Hills-ko a·dok sorkari, nichanggala gita ong·enga ine TGSCF parakataha.
“Ru·uta bilsirangonin Garo Hills-ni manderang, medical college-na nisenge dongpatokengachim indiba da·onan kamrang matchotkujaenga aro uni kosako ia medical college-ko PPP mode-osa chalaina sorkari tik ka·skaenga. Shillong medical college-ko chu·gimikkon sorkari chalaina tik ka·aha aro da·o Shillong medical college-ko a·bachengna gita National Medical Council (NMC)-ni NOC-nasan senge dongaiengaha ine adita salrangna skangsan a·dokni Health Minister parakataniko knasoe Garo Hills-ni manderang ka·a be·dapatako man·aha,” ine TGSCF-ni general secretary LC Momin parakataha.
“Chinga private company-rangni kosako jegalenga ong·ja indiba medical college-ko chalaiani kattade ramram ong·ja. Iade commercial ba dal·dalgipa dokkanrangko kulienga ong·ja indiba chingni manderangna sanna banani aro chingni chadamberangna medical-ko poraina cholko on·enggipasa ong·a. Ia medical college-ko private company-na on·ahaode ia college-ko kuliani miksonganian dongjawaha maina private company-rangde, an·tangtangni dakronga bewalosa aro korosrangosa college-ko chalaignok,” ine TGSCF parakataha.
Garo Hills-ni manderangko ia kamo nichanggalgija, Tura Medical College-ko sorkari an·tangan chalaichina gitaba TGSCF, a·dokni Chief Minister aro Health Minister-ko mol·molataha.