KHARKUTTA: North Garo Hills a·jani Kharkutta C&RD Block ning·o donggipa Na·chi Rongdik songko galchipengani a·sel mamingni gitan namroro silroroaniko nikna man·jaenga ine kobor on·timgiparang parakataha.
Ia songara, Kharkutta-oni kilometer 20-mang chel·ao donggipa song ong·a aro ia songo te 52 nokdangrang aro sak 350-mangni gita manderang songdongtokpaenga.
A·chik State People’s Forum (ASPF) Kharkutta unit-oni u·iataniko man·soani ja·man ia songbadna kobor on·timgipa manderangoni saksa ia songona re·angon, ia songo lekka pora, rama jal·lang, bijoli aro uandakgipa pilak kamrangon ja·manchakenganiko nikna man·aha.
Na·chi Rongdik songo Lower Primary aro Upper Primary skulrang donga aro ia songni LP skulde songni bijangchion ong·e, songni 50-na batpilen bi·sarangna lekka porako on·enga. Ia LP skulko skigipa sakgni aro managing committee-chi chalaienga indiba ia skulo kuturi ge·saon indita sak bi·sarangna lekka porako on·na nangenga.
Kobor on·timgiparangni u·iatani gitade, bilsisana skang mikka balwa ta·rakanganio ia skul nokni nokkingko pe·angaha aro untalan ia skulko chalaianio neng·nikanirangko chagrongna nangtokengaha. Da·o ia skul nokni obosta namsrangjahani a·selan mikka waoba skul ka·na man·jaenga aro sal rakoba bi·sarang ding·ako chake lekka porako ra·na nangskaengaha.
Da·o ia songni community hall dakenggipa noko, bi·sarangna class-ko ra·enga indiba ia nokba tin aro ba·rarangchi kapengaigipa noksa ong·e mikka wagenchimode jakkalna man·jaenga ine u·iataha.
Ia skulni bidingo songni manderang, bilsisana skangan a·dokni Chief Minister Conrad Sangma aro Kharkutta-ni MLA Rupert Momin-koba gronge agangrikahachim indiba da·alonan maming dakchakanirangko man·kujaenga ine songni dilgiparang parakataha.
“Ia skulni obosta namsrangjahani a·selan bilsi tong·sade skul ka·na man·rongja aro iani a·selan songni bi·sarang, lekka poranio namen ja·manchakatako man·engaha. Uni gimin iani bidingo ta·raken maiba dakchakanirangko on·pachina chinga Education department aro a·dok sorkariko mol·molatenga,” ine ASPF Kharkutta unit-ni president Stephen Marak parakataha.
Na·chi Rongdik songona Kharkutta-Rajasimla ramaoni km 3.5-mangni gita rama donga indiba ia ramani obosta namsrangjani a·selan songni nokni manderang, re·ruraanio neng·nikanirangko chagrongna nangtokenga ineba kobor on·timgiparang parakataha.
Ia songona dakanggipa ramarang namsrangjahani giminan songni manderang, MGNREGA-ni tangkarangchi metre 300-mang ong·gipa ramakode an·tangtang tariahachim indiba bangkikode uamangba tangkarang dongjae tarina man·jaha ineba songni manderang parakataha.
Skangode ia songona gari gora re·na man·gipa ramaan dongjani a·sel songni manderang ja·achisa songre songgabatna nangtokachim indiba ja·mano Kharkutta-ni gitcham MLA aro da·o ong·enggipa Cherak W Momin-sa, ia songona kutcha ramako tarie on·aha ineba songni manderang parakataha.
Ia songo, jasa skangan bijoliko on·enggipa transformer nosto ong·aha aro untalan ia songo andalmin·diksa dongna nangtokenga ineba songni manderang u·iataha.
