SHILLONG: Bangladesh a·songo so·sojengjeng ong·anirangko nikna man·engani gimin ong·gija dakgipa manderang, Meghalaya a·dokona napsrukbae ong·gija kamrangko ka·ani cholrang donga ine Budbar salo, Opposition dolni dilgipa Mukul Sangma, a·dok sorkarina mikrakataniko on·angaha.
Iani bidingo kobor ra·timgipa manderang baksa agangrikengon, Bangladesh a·songara Meghalaya a·dok baksa nangchapgipa biap ong·ani gimin kenchakna nanganirang donga aro ia biaprang gita bobil dake chakatgipa manderang, re·rurana jakkalronga ine Sangma parakataha.
Koborrangko man·soahaon sorkari, kakketko am·sandina nangchongmota ine janapatengon, batanggimin somoirangosa Bangladesh sorkari, iandakgipa kamrango Meghalaya aro salgro salaram jol gimiknan dakchakanirangko on·achim ine Sangma aganaha.
Bangladesh a·songo da·o obostarang dingtangahani gimin sorkari pangnan mikrake dongna nangchongmotengaha ine janapatskaengon, ong·gija dakgipa manderangni bidingo kobor man·ani cholrangko sorkari name jakkalna nanga ine Opposition dolni dilgipa aganaha.
Meghalaya a·doko skia pora donggipa chadamberangko bobil dolrangko rimnapengani gimin a·doko bobil dake chakatgipa dolrang ong·kattaiani cholrang donga ine adita salrangna skangsan koborrangko man·ahachim.
ULFA bobil dolni dilgipa Drishti Rajkhowa gita dakgipa bobil dolni manderang, Meghalaya a·dokosa an·tangtangko bame on·aha ine janapatengon, Rajkhowa gita saksa bilakgipa bobil dolni dilgipa, maikai an·tangni body guard sakgnimangmang baksa bame on·eaha, iarangni bidingo sorkari name am·sandina nanga ine Sangma aganaha.
ULFA bobil dolni dilgipa badita silchidarerangko sorkarina pakwateaha, iakoba talate on·china Sangma dabiangaha.
Meghalaya sorkari, mongsongbate a·dokni chief minister, iandakgipa koborrangni bidingo pangnan jegalrongaia ine an·tangni suk ong·gijaniko parakatengon, maini gimin a·dokni chadamberang, bobil dolrango napangenga, iani a·selrangko name ma·sie ra·china gita Opposition dolni dilgipa, a·dok sorkariko didiataha.