SHILLONG: Meghalaya Legislative Assembly-ni Autumn Session-ko re·baenggipa September 8 tarikoni 12 tarikona ong·atna tik ka·manahaon, ia session-ko salbongani gisepon matchotatna manchiahani gimin Opposition dolni dilgipa Mukul Sangma, an·tangni suk ong·gijaniko parakataha.
Iandakgipa session-rangko ong·atengon, mongsongbate budget session-rangko re·baenggipa somoirangode ru·utkale ong·atna nanga ineba ua aganaha.
Assembly session-rangko ong·atengon, kam ka·ani salrangko bang·bate ra·genchimosa a·doko ong·enggipa obostarangni bidingo membor-rang, nambate chanchirimna aro jera ra·grikna cholrangko man·gen ineba ua aganaha.
Session changantini calendar-rangkon, sorkarini kamrangna dongimin salrangchisa tik ka·ronga ine janapatengon, iandake sorkarini kamrangna dongimin salrango pangchakesa private membor-rangni kamrangnaba somoirangko tikatronga ine Opposition dolni dilgipa parakataha.
“Assembly-o nipiltaina gita sorkarini miksonganirang aro tarisamsogimin kamrangko mesoke on·na nangani gimin Session-na tik ka·gimin salrangoni bang·batakon sorkarini kamrangna tikatronga,” ine Sangma aganaha.
Sombar saloni a·bachengatenggipa Assembly-ni Autumn Session-na donsogimin salara sing·anirangko dakna aro jera ra·grikanirangko dakna somoirang chu·ongjawa ineba Sangma parakataha.
Private membor-rangni kamna salgnikosan donaiaha ine janapatskaengon, ia salgnini gisepo Opposition membor-rang, mongsonggipa sing·anirangko sorkariona ra·bana nangenga ine Sangma aganaha.
“Iandakgipa obostao MLA-rang apsan asongenba, badia kamrang nangchongmotenga, uarangko jako ra·na chanchina nanggen,” ine ua aganaha.