TURA: South Garo Hills a·jani dingtang dingtang biaprango ong·gija kamrangko ka·gipa adita sak manderangko kacharini gita bichal ka·enba, dosni kri raiko on·angaha.
Skanggipao Daljitsing A Sangma minggipa mandeko, me·chik bi·sa saksako drae til·ekanina POCSO Act 2012-ni ning·o on·gimin niamrango pangchake, bilsi 20-na pattoko donatan baksana gong 50,000 dai ra·china kachari raiko on·angaha.
Uni ja·man Kensibirth G Marak minggipa mandekoba, Under Section 305(a) BNS-ni ning·o dosi chanako man·enba bilsisana pattoko donchina aro gong 10,000 tangkako dai dake gamchina kachari rai on·aha.
Una agreba, Bangladesh a·songoni maming nangchongmotgipa lekka gri India-ona napsrukbaahani gimin Nazir Miah, Shuyal Miah aro Faysal Miah-ko Foreigners Act 1946-ni ning·o bilsignina pattoko donchina aro gong 20,000 tangkako dai gamchina kachari rai on·angaha. Hafikul Islam minggipa mandekoba niam gri India a·songona re·napbaahani gimin kachari, bilsignina pattoko donchina aro gong 10,000-ko dai gamchina rai on·angaha.