CHOKPOT: South Garo Hills a·jani Chokpot Sub-Division-ni ning·o donggipa Paromgre songo koela bikotna tik ka·aniko Chokpot jolo donggipa dingtang dingtang dolrang jegalatenba, NGO-rangni beng·ako manigija koela bikota ong·ode rakbata ja·kurangko de·e champengatskagen ine mikrakataniko on·angaha.
Chokpot jolrango songdongenggipa manderangni dingtang dingtang nangani aro neng·nikanirangko namatna gita dingtang dingtang dolrang tom·e chanchirimangani ja·man Paromgre songo koela bikotna tik ka·anikoba raken jegalataha.
“Ia tom·anio chinga Paromgre songo koela bikotna tik ka·enggipani giminba chanchirimangaha. Paromgre songo koela bikotna on·na sienga ine re·anggipa bilsiosan chinga koborrangko man·soaha aro iani bidingo chinga changni chang dingtang dingtang sorkari department-rangna badi ka·e sedoatahaoba chingni nangnikanirangko chu·sokatna maming ja·kurangko de·chipkujaenga. Iandake chingni nangnikaniko knachakjaengani gimin chinga rakbata ja·kurangko de·angskana tik ka·aha,” ine Chokpot jolni NGO-rang parakataha.
Nangchongmotgipa lekkarangko ra·chenggija ba niamrangko ja·rikgija ia songo koela bikotaniko a·bachengatgenchimode, jolni NGO-rang an·tangtangan champengskana tik ka·aha ineba parakataha.
“Chinga ia biapko re·angna nina sienga aro ia songo ong·gija dakanirangko nikgenchimode kamrangko dontongatna gita rakgipa ja·kurangko de·anggen,” ine Chokpot jolni NGO-rang parakataha.
Indake ong·engon, Chokpot jolrango donggipa PWD, hospital-rang, block office-rang aro dingtang dingtang sorkari office-rangonaba re·ange, songni manderangna nambate dangdike on·china didina gitaba ia tom·anio NGO-rang tik ka·aha ine u·iataha.