TURA: Garo Hills Autonomous District Council (GHADC)-o kam ka·enggipa manderang, ja 44-ni dormaharangko man·kujae neng·nikanirangko chagrongna nangtokengani gimin ia neng·nikanirangko namatna gita ta·raken cholrangko sandichina A·chik Holistic Awakening Movement (AHAM) aro Garo Hills-ni United Democratic Party (UDP), a·dokni Chief Minister Conrad K Sangma-ko didiataha.
Iani bidingo AHAM dolni gita Chief Minister-na sedoatengon, GHADC-o kam ka·enggipa manderang, ja 44-ni dormaharangko man·kujaengani gimin kamrangko dontonge jingjengatani da·o jagni batpilengahani a·sel GHADC-ni kamrang ja·donggatako man·na nangengaha ine ia neng·nikanirangko namatna gita ta·raken cholrangko sandichina didiataha.
“GHADC-o kam ka·enggiparang, ja 44-ni dormaharangko man·kujaengani gimin kamrangko dontongate jingjengatani da·o ja 2 sal 10 ong·pilengaha aro iandake jingjengataniko GHADC-o aro India a·song gimikon changsaba nika dongkuja. Indita salrangna jingjengataniara GHADC-o kam ka·enggiparangni neng·nikanirangko mesokasan ong·aija indiba GHADC-ko chalaianio be·gruaniko mesokaniba ong·enga,” ine AHAM-ni president George Prince Cheran Momin parakataha.
GHADC-o kam ka·enggipa manderang ja 44-ni dormaharangko man·kujaengani a·selan hajalni hajal nokdangrang, kangal cha·a sianiko chagrongna nangtokenga ine janapatengon, indita jarangni dormaharangko on·chipgija donaniara Constitution-ni Article 21 ning·o janggi tangna on·gimin bilko pe·aniba ong·enga ine AHAM parakataha.
A·dok sorkarini tangka paisarangchi ba ma·mong sorkarioniko bi·atenba GHADC-o kam ka·giparangna dormaharangko on·china gitaba AHAM didiataha.
Apsan daken Garo Hills-ni UDP-ba, GHADC-o ong·enggipa obostarangna suk ong·gijaniko parakataha aro ia neng·nikanirangko ta·raken namatchina a·dokni Chief Minister-ko didiataha.
Iani bidingo a·dokni Chief Minister-na sedoatengon, GHADC-o kam ka·giparang ja 44-ni dormaharangko man·kujaengani gimin kamrangko dontongate jingjengatengani a·sel GHADC-ni kamrang bon·chongdikna nangengaha aro ian Garo Hills gimikni manderangnan nangchakeaniko ra·baenga ine UDP Garo Hills Region-ni dilgiparang parakataha.
“GHADC-o kam ka·giparang ja 44-ni dormaharangko man·kujaengani gimin kamrangko dontongate jingjengatani da·o jagni batpilengahani a·sel Garo Hills-o namroro silroroani kamrang bon·chongdikata gita ong·engaha, ia somoirango GHADC-ba kajinarangko man·jaenga aro Garo Hills-ni manderang, dingtang dingtang licence-rangko gital dake taritaina man·jae noksan ong·na nangtokenga,” ine UDP GHR-ni dilgiparang parakataha.
GHADC-o kam ka·giparangna ta·raken dormaharangko on·e, iandakgipa neng·nikanirangko namatchina aro mikkangchi iandakgipa obostarangko chagrongtaina nangjana gita ja·kurangko de·china gitaba UDP-ni dilgiparang, a·dokni Chief Minister-ko didiataha.