SHILLONG: Meghalaya a·doko songdongenggipa manderang, bijolini gita neng·nikanirangko chagrongna nangani somoirango badi ka·na man·na gita a·dok sorkari, dingtangmancha ‘1971’ helpline nomborko a·bachengate on·aha.
Iani bidingo, Assembly-o ong·atenggipa Autumn Session-o jinmana parakatengon, bijolini bidingo manderang badi ka·na gita man·na gita ia helpline ba dakchake on·ani nomborko a·bachengataha ine Budbar salo, a·dokni Chief Minister Conrad K Sangma aganaha.
Bijolini gita neng·nikanirangko chagrongani somoirango manderangna dakchakanirangko on·na gita maming cholrang dongja ine manderangni jajrengchakengani gimin janapatengon, ia 1971 helpline nomborara online nombor ong·a aro manderang, pring 8:00 bajioni attam 8:00 bajiona ia nomborona mobile phone-rangoniba ka·atna man·aigen ine Chief Minister parakataha.
Chief Minister-ni u·iatani gitade, ia nomborona joltangtangni manderang, ku·tangchiba u·iatna man·aigen.
Ia helpline nombor-ni nodal officer-na Joint Secretary-ko donaha aro pilak badi ka·anirangkon Chief Minister-ni Office (CMO)-oni nirokanggen ineba Sangma aganaha.
“Ia helpline nomborara data-o pangchakgipasa ong·a aro pilak department-rangon connect ka·gipa ong·ani gimin manderangni badi ka·anirangko somoi gitan nirokatna man·gen,” ine Chief Minister aganaha.
Chief Minister-ni u·iatani gitade, ia helpline nombor-o hajalni hajal phone ka·atanirangko man·soaha aro ia phone ka·atgiparangoni chang 1000 batpile power department-ni kamrangna ka·ataha.
Badi ka·giparangoni bang·batan bijoli siani aro transformer-rang nosto ong·ani gimin ong·a ine janapatengon, iandake bijolini bidingo badi ka·anirangko da·o dipet 90 percent-ni gita namatna man·aha ine Chief Minister parakataha.
Ia helpline nomborko a·bachengataniara US a·songo 911 nomborko jakkala gita miksonganiosa a·bachengataha ine u·iatengon, “Ia 1971 nomborona jeba ka·ate an·tangtangni neng·nikanirangko u·iatna ba sorkari scheme-rangni giminba sing·sandiatna man·aigen. Manderang 0364-ko sikdepani ja·man 1971-ko sikdepe golpoatna man·na gita sorkari, ia helpline nomborko national level-o ong·atna kam ka·enga,” ine Sangma aganaha.