SHILLONG: Meghalaya Legislative Assembly-ni gital Deputy Speaker-ko seokna election-ko ong·atanio Opposition dolrangoni darangkoba susaatna nangnikjaengani gimin Sukrobar salo, Raksamgre constituency-ni National People’s Party (NPP) MLA Limison D Sangma, Assembly-ni gital Deputy Speaker-na seokako man·na siengaha.
Deputy Speaker-ni kamna ua, Budbar salo nomination file ka·angaha aro uni bimingko NPP-ni dilgiparang aro a·dokni Cabinet Minister sakgni, Marcuise N Marak aro AT Mondal mingaha.
Meghalaya Assembly-ni Commissioner & Secretary Andrew Simons-ni parakatani gitade, Deputy Speaker-ni election-na Budbar salan nomination file ka·ani bon·kamgipa sal ong·aha aro uamang saksani nomination-kosan man·soaiaha.
Nomination-ko ra·pilani bon·kamgipa salara Bristibar sal ong·skaenga.
Assembly-ni Deputy Speaker Timothy D Shira-ko maini gimin kam watchina aganaha, iani giminde a·dokni Chief Minister Conrad K Sangma, mamingkoba aganna gita jechakaha indiba Autumn Session matchotani ja·man ia pilak sing·anirangna talataniko on·anggen ine ku·rachakaniko on·angaha.
Limison Sangma-ko Deputy Speaker-ni kamna biming mingani gimin talataniko on·angskaengon, ua saksa ja·delbatsranggipa dilgiparangonisa saksa ong·a aro ua saksa kamrangko nikmangimin ong·ani gimin NPP-ni gita uko nominate ka·na nangnikaha ine Chief Minister parakataha.
Assembly-ni Deputy Speaker Timothy D Shira, rang·gitik Sombar salo kamtangko watangahani gimin gital Deputy Speaker-ko seokna nangengachim.