SHILLONG: Salgro salaram jolrango songdongenggipa manderangna ku·cholsan ong·e ku·rangko on·na gita dingtang dingtang political dolrangni nangrime dolko bikotaniara, ma·mongo BJP-chi dilenggipa National Democratic Alliance (NDA) baksa National People’s Party (NPP)-ni bakrimanio maming nangchakeani dongjawa ine Bristibar salo, a·dokni Chief Minister aro NPP-ni national president Conrad K Sangma a·kangataha.
“Chinga a·bachengonin NDA baksa bakrimenga aro iani bidingo maming jajaani dongjachina. Ia gital bikotgipa dolo chinga BJP-ni minister-ba donga aro NDA-o bak ong·enggipa TIPRA Motha-ba donga. Uni gimin chinga iani bidingo maming ma·sisretani dongja,” ine Sangma, kobor ra·timgiparangna aganaha.
Ia ‘One North East’ dolko re·anggipa November-ni 4 tariko, National People’s Party (NPP)-ni national president Conrad K Sangma, TIPRA Motha Party-ni dilgipa Pradyot Bikram Manikya, BJP-ni gitcham national spokesperson aro Nagalang a·dokni Minister Mmhonlumo Kikon aro Assam-o donggipa People’s Party-ni dilgipa Daniel Langthasa baksana dingtang dingtang dilgiparang, apsan soi ka·grime New Delhi-o bikotahachim ine nikna man·a.
Ia dolko bikotani bidingo talataniko on·angengon, ian salgro salaram jolrango songdongenggipa manderangni neng·nikanirangko namatna gita dingtang dingtang political dolrangni ku·cholsan ong·aniko mesokanisan ong·aia ine a·dokni Chief Minister parakataha.
“Chingni miksonganide, dingtang dingtang neng·nikanirangko namatna gita apsan ku·rangko on·na miksongani baksasa chinga ia dolko bikotaha. Ian badiaba party-ni kosako dakgrikna bikotenggipa dol ong·ja indiba salgro salaram jolni dilgiparang ong·e, salgro salaram jolrango songdongenggipa manderangni namgnina ku·cholsan bakrimaniko mesokanisan ong·aia,” ine Sangma aganaha.
Ia alliance-o Meghalaya, Mizoram aro Arunachal Pradesh a·dokrangoni mitam political dolrang baksade agangrikchengjaha ine matnanganirangna aganchakaniko on·angengon, ian da·o a·bachengatenggipa kam gitasa ong·enga ine Sangma aganaha.
“Ian kamko a·bachengmitingsa ong·enga aro a·bachengon pilakkon chinga bakrimatgen, ia katta ong·ja. Chinga adita dolrangsa apsan bakrimna gita chanchichengaha aro da·o dingtang dingtang dolrang baksaba agangrikengaha. Uamangba an·tangtangni gisepo chanchienba nanga gita ja·kurangko de·angaigen. Je dolrangan gisiko nangenga, uandakgipa dolrangde ia alliance-ona re·baaigen,” ine a·dokni Chief Minister aro NPP-ni national president parakataha.
