SHILLONG: Bihar a·doko ong·atanggipa Assembly election-o Bharatiya Janata Party (BJP)-ni chu·sokaniko man·ahani gimin re·baenggipa 2028 bilsio ong·atna sienggipa Meghalaya Legislative Assembly election-ni result-naba manderang jagokmanpilgen ine Sukrobar salo, a·dokni BJP dol, ka·dongchakenganiko parakataha.
Bihar a·doko BJP-ni cheani ja·man, Shillong songjinmao donggipa BJP office a·palo, BJP membor-rangni boma so·e kusi ong·aniko nikna man·aha.
Iani bidingo kobor ra·timgipa manderang baksa agangrikengon, da·o dipet Meghalaya a·doko BJP dol, rakbee kamrangko ka·ahaoba MLA sakgnisa chena man·kuenga indiba bakan Meghalaya Assembly-o BJP-ni MLA-rang barianggnok ine BJP-ni state president Rikman Momin parakataha.
“2028 bilsini Assembly election ja·man Meghalaya a·doko BJP dolba MLA-rang sak 10 batgnok,” ine Momin aganaha.
NPP-ni dilanichi salgro salaram jolo donggipa dingtang dingtang political dolrangni bakrime dolko songani bidingo sing·anina aganchakaniko on·angengon, ia dolrangara BJP-chi dilenggipa National Democratic Alliance (NDA) baksa bakrimgipa dolrangan ong·ani gimin BJP-na maming nangchakeani dongjawa ine Momin a·kangataha.
“Uamang salgro salaram jolni pal ku·rang on·na sikenga ong·ode on·aichina. Uamang ku·rang on·genchimoba chingni bakrangan ong·ani gimin BJP-na maming nangchakeani dongjawa,” ine BJP-ni state president aganenba, Bihar election-ni result-ara, jolni namgipa party-rang baksa bakrima ong·ode BJP chu·sokgipa ong·aigen ine mesokanian ong·aha ine Momin parakataha.
Re·baenggipa 2026 bilsio ong·atna sienggipa GHADC election-na BJP rakbee kamrangko ka·soenga ine janapatengon, Congress dolde a·songni darang biapon chu·sokgipa ong·jaengaha ine Momin a·kangataha.
