GH-o niamgri songdongenggipa aro badingchiwalgiparangko GHADC am·sandikua

TURA: Kobor-rangni gitade, Meghalaya, Garo Hills Autnomous District  (GHADC) Garo Hills a·doko niamgri songdongenggiparang aro pangchakani lekkarang gri dingtang dingtang business-rangko ka·enggiparangni kosako am·sandianiko dakna  a·bachengataha.
GHADC-ni Deputy Chief Executive Member Nikman Marak-ni Bristibar salo parkatgimin gita, a·doko niam gita songdongenggiparang aro licence donggiparangni badingchiwalanirangko dakna aro dingtang dingtang business-rangko ka·na on·nengana agrede, gipin a·dokrangoni niamgri napsrukbae songdongenggipa aro badingchiwalanirangko dakenggiparangko  Council name nirok sandianirangko dakenga ine parakatengon, “chinga niamgri napsrukbae songdongenggiparangko nirok sandianiko dakenga aro nanga gita rakgipa ja·kurangko  de·engengon  sakantian chingni bil-ni ning·o niamni gita ong·na nanggen,”  ine ua aganaha.
Garo Hills-o mittam business ka·enggiparango nangchongmotgipa lekkarang dongja jemangan mittamrangde Bangladesh-oni ong·na nanga ine  Marak  an·tangni kenchakenganiko parakataha. Indake bang·arangan niamgri kamrangko chalaienga aro mittamrang ID card-rangba donggijan, Garo Hills-o napbae business-rangko ka·enga, jekon nokchakna man·jawa ineba ua agandapaha.
Battanggimin salrango niamgri napsrukbae songdongenggiparangko skanggipa changna am·sandianiko dakangao adita nokdangrangko a·rikgalangaha. Indake am·sandianirangko dake sing·sandianirango maming pangchakani lekkarang donggijagipa gimik dam 21 nokdangrangko arikgalataha, aro una agreba a·dok sorkarini dakchakanichi Survey aro am·sandianirangko  dakengkua ine Marak aganaha.