Japan-o kam ka·enggipa nurse-rang laksamangni gita tangkarangko nokdangna watatenga: CM
SHILLONG: Meghalaya State Skill Development Society (MSSDS), Labour Department aro Employment & Skill Development-ni jadokna ong·atenggipa Japanese Language Training Program-ko Sombar salo, Shillong songjinmani Barik-o donggipa Mount View Building-o a·bachengataha aro ia program-ko a·dokni Chief Minister Conrad K Sangma baksana Asean Group Co Ltd-ni Chairman aro CEO Nishikwa Toshiaki San a·bachengate on·aha.
Ia Japanese Language Training program-o skie ra·na gita sak 86 chatro chatrirang, biming segattokaha.
Ia training program-ko a·bachengate on·anganio a·dokni Chief Minister, jinmana aganprakangengon, dingtang dingtang kamni a·bao Meghalaya sorkari, Japan a·song baksa bakrime kamrangko ka·enga ine parakataha.
“Chinga dingtang dingtang a·songrang baksa apsan somoion bakrime kamrangko ka·na nangnikja maina gimik baksaan bakrimaigenchimode darangmingba melina gita man·jawa,” ine Sangma aganenba, Japan aro salgro salaram a·dokrangni gisepo cha·ani ringani aro dakbewal rikbewalrang apsananga ine parakataha.
Japan a·song baksa bakrime kamrangko ka·enggipani gimin janapatengon, bilsignina skang a·dokni nurse sakgnikosan Japan a·songona watatkuengachim indiba da·alo sak 37 nurse-rang Japan a·songo kam ka·engaha aro re·baenggipa jarangode bang·bata chadamberangan, Japan a·songona re·ange kamrangko ka·na ka·dongsoenga ine Chief Minister parakataha.
“Japan a·songo kam ka·enggipa a·dokni nurse-rang, N4 Grading-o kam ka·engani gimin bang·bate dormaharangko man·na gita N3 Grade-o kam ka·china chinga nangnikenga. An·chingni nurse-rang, lak 1-mangni gita tangkarangko an·tangtangni nokdangrangna watatenga aro foreign exchange-ode ia sak 37 nurse-rangni ning·o bilsiprakon gong kror 5-mangni gita an·chingni a·dokona re·baenga,” ine Sangma aganaha.
Kamrangko ka·e tangka paisarangko kamainasan ong·aigija kamrangko skie ra·china gitaba a·dok sorkari, a·dokni chadamberangko Japan a·songona watatna gita cholrangko on·na nangnikenga ineba ua aganaha.
Japan a·songo kam ka·enggipa sak 37 nurse-rang, Bangalore-o jadokna training-ko ra·chengna nangaha ine janapatskaengon, da·alo ia training-o skie ra·enggipa chadamberangde Shillong-on skie ra·na man·engani gimin namen rasong gnanggiparang ong·a ine Chief Minister aganaha.
Japan a·songoni skigipa sakgnina rimchaksoani kattarangko aganangengon, uamangni donganio dingtang dingtang neng·nikanirangko chagrongna nanggenchimoba, uamangna dongtoaniko on·na gita a·dok sorkari aro Meghalaya a·dokni manderang jotton ka·gen ine Chief Minister ku·rachakaniko on·angaha.
Ia Japanese Language Training Program-ko a·bachengatanio, a·dokni Labour Minister Methodius Dkhar, Japanese ku·sikko skigiparang aro MSSDS-ni official-rangba dongpae bak ra·angaha.
