TURA: Tribal-rangna on·gimin bilrangko chel·chakchina, jatni daka rikanirangko ripingna nangani aro Garo Hills Autonomous District Council (GHADC)-ko chalaianio kamrangko namdapatchina didie Sombar salo, A·chik State People’s Front (ASPF), GHADC-ni Chief Executive Membor (CEM) Albinush R Marak-na memorandum-ko on·angaha.
Jatni bil aro daka rikanirangko chel·chakna nangengani gimin GHADC-ni CEM-na seachi u·iatengon, GHADC-o gipin jatrang, mongsongbate Tribal ong·gijagipa manderang bak ra·na man·jana gita dingtang electoral roll-ko tarichina, Garo Customary Law (GCL)-ko taridapenba ta·raken ra·gatchina, GHADC a·jani ning·o Mouza No. VI-ko ra·galchina, Tribal-rangna on·gimin bilrangko tangatpilchina aro dingtang dingtang nangchongmota kamrangni gimin ASPF-ni general secretary Bernita R Marak janapataha.
GHADC-ko chalaianio mangrakbatatna nangengani gimin janapatskaengon, songo noko Nokmarangni bilko mangrakbatatchina, a·a pattarangko tarianio rakgipa niamrangko ja·rikchina, anti encroachment task force-ko songchina, an·cheng, ro·ong bikotani aro chijolrango bading chiwalgrikna gita niamrangko ra·gatchina gita ASPF, GHADC-ni CEM-ko didiataha.
