SHILLONG: Congress dolni a·doko bilakbapiltaina miksonganirang, Bihar election-ni ja·manon gimaangaha ine National People’s Party (NPP)-ni working president aro a·dokni Cabinet Minister Marcuise N Marak parakatenba, re·baenggipa 2026 bilsini a·bachengachibara ong·atna sienggipa Garo Hills Autonomous District Council (GHADC) election-o NPP-an chegipa ong·taigen ine a·kangataha.
“Election ge·antian dingtang dingtang ong·ani gimin ian chingna altugen inede anga aganjawa. Indiba Congress dolni bilakbapiltaina miksonganirangde Bihar election-ni ja·manon gimaangaha. District council election-o mai dakgipa balwa balna sienga an·ching niksamsona man·engaha,” ine Marak aganaha.
Chief Minister Conrad K Sangma-ni dilanichi, namroro silroroani kamrangko ra·baanian GHADC election-o NPP-ko chegipa ong·atna dakchakgen ineba Marak aganaha.
“Conrad K Sangma-ni dilanichi a·dok sorkari namen kamrangko ka·engani gmin chinga Garo Hills-o songdongenggipa manderangni chakpaanirangko man·na ka·dongenga,” ine ua aganaha.
GHADC-o kim·kim ong·aniko aro dingtanganiko ra·bapilna nangengani gimin janapatengon, district council-o niksamsoani donggipa dingtanganiko ra·bana ine Garo Hills-ni manderangko, NPP-na pu·onchina NPP-ni working president didiataha.
Marak-ni a·kangatani gitade, GHADC-ni mongsonggipa neng·nikanirangkon NPP-chi dilenggipa MDA sorkari namatna man·aha aro GHADC-o dingtanganiko nikna a·bachengengaha.
“NPP-ko seokanichisan iandakgipa dingtanganikode ra·bana man·aigen,” ine Marak aganaha.
GHADC-o Executive Council-ko chalaiahani gimin election-o NPP-na on·tisa bilgriatanide dongaigen ine janapatengon, NPP-chi dilenggipa a·dok sorkari, district council-ba bang·en namgnirangko ra·baskaaha ine NPP Minister a·kangataha.
GHADC election-na skang gipin political dolrang baksa nangrime kamrangko ka·ama ka·jawa iani giminde uamang chanchia dongkuja ineba Marak parakataha.
