SHILLONG: MLA-rang an·tangtangni scheme-rangko name jakkalama jakkaljaenggenma ine adita salrangna skang a·dokni Chief Minister Conrad K Sangma aganahani gimin MLA-rangni tangka paisa jakkalaniko jakgitele sandirokatchina gita Voice of the People’s Party (VPP) president Ardent Miller Basaiawmoit, a·dokni Chief Minister-ko didiataha.
Iani bidingo a·dokni Chief Minister-na sedoatengon, “MLA-rang, an·tangtangna chamatgipa MLA scheme-ni tangkarangko name jakkalama jakkaljaenggen ine nang·ni jajrengchakanina anga nang·ko mittelna ska. Nang·ni agana gitan MLA scheme-rangko name aro parak ong·e jakkalna nanga ine anga an·tangba nangnika,” ine Basaiawmoit parakataha.
Iani bidingo VPP-ni dilgiparang, an·tangtangan ja·kurangko de·chakataha ineba Basaiawmoit parakataha.
“Sorkarini scheme-rangko jakkalanio parak ong·na aro hisap dongna nanga ine VPP bebera·ani gimin MLA scheme-rangko name jakkalchina gita chinga, VPP-ni pilak MLA-rangna seatmanaha,” ine VPP president parakataha.
Chief Minister-ni agangipa kattarangara, iana chinko mesokani gita ong·aha ine janapatengon, MLA scheme-rangko jakkalani bidingo jakgitele sandirokatchina gita Basaiawmouit didiataha.
2008 bilsionin Nongkrem constituency-o jakkalgipa MLA scheme-rangko sandirokna nanga ineba ua didiataha.
Manderangni namgnina kamko ka·china gitaba VPP-ni president, a·dok sorkariko didiataha.
“MLA scheme-rangni gimin a·dokni manderangba tale ma·sie ra·china ia kamko na·a gisiko nange jako ra·gen ine anga ka·dongenga,” ine Basaiawmoit, Chief Minister-na sedoatgipa chittio parakataha.
“Opposition MLA-rangni constituency-rango MLA scheme-ko name jakkalama jakkaljaenga anga ma·sija. MLA-rang aro MP-rang an·tangtangni scheme-rangko maikai jakkalenga, uko ma·sie ra·na gita manderang RTI ka·na nanga,” ine adita salrangna skangsan a·dokni Chief Minister aganahachim.
