TURA: West Garo Hills a·jani Pedaldoba Rongsai jolo donggipa Garo Hills Autonomous District Council (GHADC) Forest department-ni a·arango, gipin jatrang niam gri nokrangko rike dongenga ine Pedaldoba aro Phulbari-ni A·chik Dedicated Integrity Leaders (ADIL) dol, GHADC-ni Deputy Chief Executive Membor Nikman Ch Marak-na badi ka·doatenba, ia biaprango niam gri nok rike dongenggipa manderangko a·rikgalchina didiataha.
Iani bidingo GHADC-ni Deputy CEM-na badi ka·e sedoatengon, Pedaldoba Rongsai Bazar sambao GHADC-ni ning·o donggipa Forest department-ni a·ao, gipin jatrang, maming lekka pancha gri, nok-jamrangko rike dongenga ine ADIL-ni president Jack Sangma parakatenba, ia biapo niam gri songdong a·chaenggipa manderangni kosako ta·raken rakgipa ja·kurangko de·china didiataha.
“GHADC Forest department-ni a·ao gipin jatrang, maming lekka pancha gri, biaprangko a·kangenba, nok-jamrangko rike dongenga. Uni gimin GHADC-ni a·ao niam gri nok rike dongenggipa manderangni kosako ta·raken ja·kuko de·na nanga aro ia manderangko ia biaponiko ta·raken a·rikgalna nanga,” ine ADIL Pedaldoba regional unit aro Phulbari Western Zone-ni dilgiparang, GHADC-ni Deputy CEM Nikman Ch Marak-na sedoatgipa chittio janapataha.
