SHILLONG: Lekka porani kamrangna bilsiprakon gong kror 3,600 tangkarangko chame on·engoba nangnikani gita chu·sokanikode man·kujaenga ine a·dokni Chief Minister Conrad K Sangma aganaha.
Salgro salaramni skanggipa Ramakrishna Mission College-ko Sohra-o kulie on·angani somoio ia kattarangko Chief Minister aganaha.
Ia college-ko kulie on·anganio a·dokni Chief Minister, jinmana aganprakengon, lekka porani kamrangna sorkarini budget-oniko 15 percent-mang ong·nasipile chamronga indiba lekka porao nangnika gita chu·sokaniko man·kujaenga ine parakataha.
Meghalaya aro Tripura a·dokrangko tosusae aganangengon, Tripura a·doko lak 40-mangni gita manderang donggenchimoba skulrangde dam 4000-mangni gitasan dongaia indiba Meghalaya a·dokode lak 38-mangni gitasan manderang donggenchimoba skulrangde dam 14,000-mangni gita dongskaa ine Chief Minister parakataha.
“Tripura-ode sak 40,000-mangni gita skigiparang donga aro an·chingode sak 55,000-mang dongskaa,” ine Sangma aganenba, lekka porani kamrango bilakgipa niamrang gri skul aro skigiparang bang·dugaanichi neng·nikanirangko chagrongna nanga ine parakataha.
Education department-ni chagrongna nangenggipa dingtang dingtang neng·nikanirangko janapangengon, bang·bata skulrangon, dingtang dingtang section-rangko dingtang dingtang managing committee-rangsa chalaiani a·sel skulrangko chalaianio neng·nikanirangko man·ronga ine Chief Minister aganaha.
Meghalaya a·dokni dam 2400-mangni gita skulrango, poraigipa chatro chatrirang sak 10-an gapja aro mitamode poraigipa chatro chatrirangan dongsrangja ineba ua aganaha.
