TURA: Re·baenggipa 2026 bilsini a·bachengachibara ong·atna sienggipa Garo Hills Autonomous District Council (GHADC) election-o Tribal ong·gijagipa candidate-rangni susapaaniko Niksamso Garo Community Organisation (NGCO) raken jegalataha.
NGCO-ni parakatani gitade, Tribal-rangni, mongsongbate A·chik jatni bil, a·a-chia, daka rikani aro songo noko Nokmarangchi chalaiani bilrangko rakkina gitasa GHADC-ko Indian Constitution-ni Sixth Schedule ning·o on·ahani gimin GHADC election-rango Tribal ong·gijagipa manderangni bak ra·aniara niamni a·palo ong·a.
“GHADC-ni niam retirangon, district council-ko A·chik Tribal membor-rangan an·tangtang dilna nanga ine janapani donga. District Council-ni kamrango aro election-rango Tribal ong·gijagipa manderangde bak ra·pana maming niam aro bil dongja,” ine NGCO-ni dilgiparang parakataha.
GHADC election-rango Tribal ong·gijagipa candidate-rangko susana on·aniara GHADC-na on·gimin bilkon pe·ani gita ong·enga ine janapatengon, ian Garo Hills-o songdongenggipa A·chikrangni daka rikani, a·a chia aro on·gimin bilrangna kenchakna nanganiba ong·enga ine NGCO parakataha.
“Uni gimin GHADC-ni niam retirangko rakkichina aro GHADC election-o A·chik Tribal candidate-rangkosan susana on·china chinga bilo ong·enggipa manderangko didienga,” ine NGCO-ni dilgiparang parakataha.
