SHILLONG: Re·baenggipa 2026 bilsio ong·atna sienggipa Garo Hills Autonomous District Council (GHADC) election-o National People’s Party (NPP) aro Congress dolni gisepo bilake susagrikna sienga ine ka·dongsona man·engon, ia election-o Congress dolnade maming gimaani dongjawa ine Congress dolni dilgipa aro Tura-ni MP Saleng A Sangma parakatskaaha.
Sangma-ni aganani gitade, Meghalaya a·doko Congress dolni MLA aro MDC saksaba dongjahani gimin GHADC election-oba maming gimaani dongjawa.
“Indake ong·genchimoba, election-na chingni campaign ka·anio chinga Meghalaya a·doko maia ong·enga, kakketko chinga manderangna mesokna jotton ka·gen,” ine Sangma aganenba, Meghalaya a·doko maikai pekatgipa samrangko jakkalanirang batroroenga, jatni daka rikanirangko maikai gimaatenga aro maikai Sixth Schedule-ni biapo Panchayati Raj system-ko ra·drabana jotton ka·enga iarangni bidingo manderangna mesoke on·anggen ine parakataha.
Tura MP-ni parakatani gitade, maikai a·doko Tribal-rangni a·arangko pale cha·enga aro maikai ADC-rangni bilrangko sorkari ra·sekenga, uarangni giminba Congress dol, manderangna mesoke on·anggen.
A·doko ong·enggipa obostarang apsan daken ong·angkuaiode a·doko songdongenggipa Tribal manderangni daka rikanirang gimana siengaha ine janapatengon, Bihar election-ni result-rangko parakani ja·man Congress dolni bilakbaanirang gimaangpilaha ine NPP-ni agananiko Sangma raken jegalataha.
“Bihar aro Meghalaya a·dokde namen dingtanggrika aro Bihar election-ni result-rangde maming dakeba Meghalaya-o nangchakeani dongjawa. Political party dolantian an·tangtangni bebera·ani aro niamrango pangchake election-o manderangko salna jotton ka·genchimoba, election-o dilgipako seokanide manderangni skaniosa ong·aia,” ine Tura MP aganaha.
“Chingni nangnikanide manderangna kakketko mesoke on·anian ong·enga, uamang namnikoba namnikjaoba uade manderangni jakosa pangchakaia,” ine Sangma aganaha.
Manderangni daka rikanirangko nisie galgiparang baksa ong·genma, ma manderangni daka rikanirangko warachakgipa baksa ong·gen, uko baseanide manderangni jakosajok ineba ua aganaha.
Meghalaya a·doko tangka paisarangchi manderangko salrongani gimin sing·anina aganchakaniko on·angengon, tangkade adita salrangnasan dongaigen ine Sangma talataniko on·angenba, manderang an·tangtangni mikkangchi janggi tanganiko tangka paisana pale cha·genma ma a·songo dingtanganiko ra·bana sikenga, uade manderangni jakosa ong·aia ine Sangma parakataha.
