SHILLONG: West Garo Hills a·jani Tura songjinmao donggipa Government Administrative Department (GAD)-ni a·arango, ru·uta bilsirangna songdongenggipa manderangna a·dok sorkari, a·arangko baditaba bilsirangna para dake on·skaenba songgigrikna tik ka·angaha ine Budbar salo, a·dokni Chief Minister Conrad K Sangma parakataha.
Shillong songjinmani Ward’s Lake-o skanggipa changna Cabinet tom·aniko ong·atani ja·man iani bidingo kobor ra·timgiparangna talataniko on·angengon, “Batanggimin bilsi 30-50-mangna manderangni songdong a·chaenggipa sorkarini a·arang donga aro iandakgipa bang·bata obostarangnan kachario case-rang ong·kuenga. Badiaba somoirangode, ia sorkarini a·arango songdongenggipa manderangko wate on·china gita u·iatanirangko on·ahani a·sel manderang neng·nikanirangko chagrongna nangaha aro basakobade so·sojengjeng ong·anirangkoba nikna nangaha. Uni giminsa bilsi gittamna skang, Williamnagar-o jekai sorkarini a·ao songdongenggipa manderangna sorkari cholko on·aha, apsan daken da·o Tura songjinmaoba sorkarini a·ao songdongenggipa manderangna ia cholko on·na sorkari tik ka·aha. Ian sorkarini a·ao songdongenggiparangna para on·skaani chol ong·engani gimin sorkarina kajina man·dapani a·arangba ong·gnok,” ine Chief Minister parakataha.
Ia kamo dingtangmancha niamko ja·rikgen aro ia niamo pangchake, mikkangchi ia biaprango songdongenggipa manderangna ba sorkarina maming neng·nikanirang dongjana gita cholko on·anggen ineba ua aganaha.
Ia kamni skanggipa bakko bakan a·bachenggnok ine parakatengon, “Je gittimrangkon survey ka·e digital map-rangko tarimanaha aro je gittimrango songdongenggipa manderangan sorkarini ja·ku de·aniko ra·chakahachim, ia gittimrangko skanggipa bako a·bachengatgen. Iana batanggimin bilsignina public hearing aro pilak nanga kamrangko ka·manaha,” ine Chief Minister aganaha.
Je gittimrangan sorkarini ja·ku de·aniko ra·chakna man·kujaenga aro sorkari ba revenue department baksa meligrikna man·kujaenga, uandakgipa gittimrangkoba sorkari drajawa ineba Chief Minister, ku·rachakaniko on·angaha.
“Chinga ia gittimrangko draenga ong·ja indiba gnigipa bako chinga uamang baksa agangrikangkugen,” ine Sangma aganaha.
Tura songjinmana ia ja·ku de·aniara namen nangchongmotgipa ong·enga ine janapatskaengon, “Iakon anga an·tangba skangonin dakna aganengachim maina ian angni constituency-ni ning·on ong·ani gimin anga an·tangba neng·nikanirangko ma·sichaka. Iani bidingo anga manderang baksa agangrikenga aro da·alo iako manderang baksa songgigrikna man·engahani gimin anga namen kusi ong·a,” ine Chief Minister aganaha.
